Չինաստանը պատրաստ է խորացնել համագործակցությունը Հայաստանի հետ անվտանգության ոլորտում
Չինաստանը պատրաստ է խորացնել համագործակցությունը Հայաստանի հետ բոլոր ոլորտներում, այդ թվում՝ անվտանգության, երեքշաբթի՝ հուլիսի 30-ին, հայտարարել է Հայաստանում Չինաստանի գործերի ժամանակավոր հավատարմատարի պաշտոնակատար Չեն Մինգը, հաղորդում է «Արմենպրես»-ը։
Դիվանագետն այս մասին ասել է Չինաստանի Ժողովրդա-ազատագրական բանակի հիմնադրման 97-րդ տարեդարձին, որը նշվել է Հայաստանում Չինաստանի դեսպանատանը։
Իր խոսքում Մինգն ընդգծել է, որ Ժողովրդա-ազատագրական բանակը զգալի ներդրում է ունեցել նոր Չինաստանի ստեղծման և զարգացման գործում 1927 թվականի օգոստոսի 1-ից ի վեր և կարևոր դեր է խաղացել համաշխարհային խաղաղության ու կայունության պահպանման գործում:
«Չինաստանը իրապես հավատարիմ է եղել անկախ, ինքնաբավ և խաղաղ արտաքին քաղաքականությանը, ինչպես նաև ազգային անվտանգության պահպանմանը: Յոթանասուն տարի առաջ, դիմակայելով թեժ պատերազմների սարսափներին և Սառը պատերազմի շրջափակմանը, Չինաստանն առաջարկեց խաղաղ գոյակցության հինգ սկզբունքները: Այս սկզբունքները միաձայն ճանաչվել են միջազգային հանրության կողմից և դրանից հետո դարձել միջպետական հարաբերությունների կարգավորման լայնորեն ընդունված նորմեր։ Այսօր, վերջին 70 տարիների աննախադեպ փոփոխությունների ֆոնին, Չինաստանը, հավատարիմ մնալով համաշխարհային խաղաղության պահպանմանն ու ընդհանուր զարգացմանը նպաստելու իր արտաքին քաղաքականության նպատակին, ձգտում է կառուցել մարդկության համար ընդհանուր ապագա ունեցող համայնք»,- ասել է չինացի բարձրաստիճան պաշտոնյան։
Նրա խոսքով` չինացի և հայ ժողովուրդները գնահատում են խաղաղությունը և ձգտում դրան։ Դիվանագիտական հարաբերությունների հաստատումից հետո վերջին 32 տարիների ընթացքում երկու կողմերը հարգել են միմյանց ինքնիշխանությունը, անվտանգությունը և տարածքային ամբողջականությունը՝ շարունակելով զարգացնել բարեկամական համագործակցությունը՝ հիմնված հավասարության և փոխշահավետության վրա։
«Վերջին տարիներին երկու երկրների ղեկավարների ռազմավարական ղեկավարությամբ Չինաստան-Հայաստան ռազմական համագործակցությունը զգալի հաջողությունների է հասել՝ դրական ներդրում ունենալով տարածաշրջանում խաղաղության և կայունության պահպանման գործում։ Չինաստանը պատրաստ է էլ ավելի խորացնել փոխանակումները և համագործակցությունը Հայաստանի հետ բոլոր ոլորտներում, այդ թվում՝ անվտանգության ոլորտում, ինչպես նաև բարձրացնել երկկողմ հարաբերությունները նոր մակարդակի վրա»,- եզրափակել է դիվանագետը։
Ավելացնել նոր մեկնաբանություն