Իրանի և Իրաքի պաշտպանության նախարարներն անվտանգային հարցեր են քննարկել
Իրանի պաշտպանության նախարար Մոհամմադ Ռեզա Աշտիանին հանդիպում է ունեցել Իրաքի պաշտպանության նախարար Թաբեթ Մուհամմադ Սայիդ ալ-Աբբասիի հետ։ Ինչպես հաղորդում է իրանական «Mehr» լրատվական գործակալությունը, հանդիպման ընթացքում կողմերը քննարկել են երկկողմ անվտանգությանն ու սահմաններին վերաբերող հարցեր:
Աշտիանին ընդգծել է երկրների միջև միասնության պահպանման և ամրապնդման անհրաժեշտությունը։ Նրա խոսքով՝ հաշվի առնելով Թեհրան-Բաղդադ հարաբերությունները քանդելու որոշ թշնամիների ջանքերը՝ անհրաժեշտ է, որ երկու կողմերն էլ զգույշ և զգոն լինեն այս դավադրությունների նկատմամբ։
Իրանի պաշտպանության նախարարը հայտնել է, որ Իրաքի հետ կապված խնդիրների նկատմամբ Իրանի մոտեցումը հիմնված է Իրաքի միասնությանն ու ամբողջականությանն աջակցելու, կայունության ու անվտանգության ամրապնդմանն ու երկրի բարգավաճմանը նպաստելու վրա։
Անդրադառնալով Իրաքի տարածքում ահաբեկչական խմբավորումների առկայությանը՝ Աշտիանին նաև կոչ է արել ուժեղացնել երկու երկրների միջև ռազմական, հետախուզական և անվտանգության համակարգումը։ Նա ասել է, որ Իրանը պատրաստ է պաշտպանական արդյունաբերության ինքնաբավության ոլորտում իր փորձը փոխանցել հակառակ կողմին։
Իրաքի պաշտպանության նախարար Թաբեթ Մուհամմադ Սայիդ ալ-Աբբասին բարձր է գնահատել Իրանի կողմից Իրաքին ցուցաբերված աջակցությունն ահաբեկչության և ահաբեկչական խմբավորումների դեմ պայքարում։ Նա կոչ է արել զարգացնել Իրան-Իրաք համագործակցությունը՝ տարածաշրջանային մարտահրավերներն ու ճգնաժամերը լուծելու համար։
Նա միևնույն ժամանակ կարևորել է Իրաքի զինված ուժերը վերակառուցելու երկրի կառավարության ընդունած որոշումը՝ կոչ անելով օգտագործել Իրանի կարողությունները տեխնիկական, տեխնոլոգիական և ուսումնական ոլորտներում:
Ավելացնել նոր մեկնաբանություն