Ադրբեջանն ուսումնասիրում է Թեհրանում իր դեսպանատան վրա կատարված հարձակման մանրամասները. Բայրամով
Ադրբեջանի արտաքին գործերի նախարար Ջեյհուն Բայրամովը հայտարարել է, որ Բաքուն ուսումնասիրում է Թեհրանում իր դեսպանատան վրա կատարված հարձակման մանրամասները։ Ինչպես հաղորդում է ադրբեջանական APA լրատվական գործակալությունը, Բայրամովն այս մասին ասել է Իրանի տնտեսական դիվանագիտության հարցերով փոխարտգործնախարար Մեհդի Սաֆարիի հետ կայացած հանդիպման ժամանակ։
Հանդիպման ժամանակ կողմերը քննարկել են Բաքվում կայանալիք Չմիավորման շարժման գագաթնաժողովի օրակարգը, ինչպես նաև Թեհրանում Ադրբեջանի դեսպանատան նկատմամբ իրականացված հարձակման մանրամասները։ Ադրբեջանի արտգործնախարարը կարևորել է, որ հարձակման պատասխանատուներն ամենախիստ ձևով պատժվեն։
Բայրամովը հիշեցրել է, որ Վիեննայի կոնվենցիայի համաձայն՝ ընդունող երկրի պարտականությունն է ապահովել աշխատակիցների անվտանգությունը և դիվանագիտական ներկայացուցչությունների շենքերի պաշտպանությունը։
Նա հավելել է, որ Ադրբեջանը մանրակրկիտ ուսումնասիրում է հարձակման մանրամասներն ու տեսագրությունները։ Վերջինս նաև նշել է, որ Իրանն այս գործի շրջանակում պետք է պատասխանի Ադրբեջանի մի շարք հարցերին։
Հիշեցնենք, որ հունվարի 27-ին Թեհրանում Ադրբեջանի դեսպանատան նկատմամբ զինված հարձակում է իրականացվել, որի հետևանքով դեսպանատան մեկ աշխատակից սպանվել է, ևս երկուսը՝ վիրավորվել: Հարձակումից անմիջապես հետո Ադրբեջանը դեպքն ամենաբարձր մակարդակով որակել է որպես ահաբեկչություն, մինչդեռ իրանական կողմը բացառում է ահաբեկչության վարկածը։
Ավելացնել նոր մեկնաբանություն