Հայաստանն օրերս Ադրբեջանից առաջարկներ է ստացել խաղաղության պայմանագրի նախագծի վերաբերյալ. Փաշինյանը հիմնարար խնդիրներ է տեսնում
«Հայաստանն օրերս Ադրբեջանից առաջարկ է ստացել խաղաղության պայմանագրի նախագծի շուրջ իր առաջարկների վերաբերյալ»,- այսօր ասուլիսի ժամանակ հայտնել է վարչապետ Փաշինյանը:
Նա հիշեցրել է, որ փետրվարի կեսերին Հայաստանը խաղաղության պայմանագրի նախագծի վերաբերյալ հերթական արձագանքն էր փոխանցել Ադրբեջանին՝ հայտնելով, որ 2-3 օր առաջ ստացվել է Ադրբեջանի արձագանքը Հայաստանի նախագծի վերաբերյալ:
«Ի՞նչ կարող եմ ասել այդ փաստաթղթի առումով: Կա՞ արդյոք առաջընթաց այդ փաստաթղթում: Պետք է ընդգծել, որ որոշակի առաջընթաց մենք տեսնում ենք: Բայց ինչքան տեսնում ենք առաջընթաց, այնքան ի հայտ են գալիս ֆունդամենտալ խնդիրներ: Որո՞նք են այդ ֆունդամենտալ խնդիրները: Մենք տեսնում ենք, որ Ադրբեջանը փորձում է խաղաղության հնարավոր պայմանագրի միջոցով Հայաստանի Հանրապետության նկատմամբ տարածքային նկրտումներ ձևակերպել, ինչը, բնականաբար, կարմիր գիծ է մեզ համար: Մենք տեսնում ենք, որ այդ տեքստի առաջարկներով ցանկանում են Լեռնային Ղարաբաղում ցեղասպանություն կամ էթնիկ զտումներ իրականացնելու մանդատ ձեռք բերել, այդ թվում՝ Հայաստանի Հանրապետության ստորագրությամբ: Դա, բնականաբար, նույնպես կարմիր գիծ է մեզ համար: Մենք տեսնում ենք նաև, որ Ադրբեջանը հետապնդում է այնպիսի գիծ, որ մենք պայմանագրի կատարման երաշխիքների համակարգ չունենանք, ինչը նույնպես կարմիր գիծ է մեզ համար: Որովհետև մենք այսօր ունենք ստորագրված և հրապարակված փաստաթուղթ, որը չի կատարվում: Խոսքը 2020 թվականի նոյեմբերի 9-ի եռակողմ հայտարարության մասին է: Այդ հայտարարության համար Բերձորի միջանցքը որևէ կերպ փակ չպետք է լիներ, իսկ Բերձորի միջանցքը փակ է: Հետևաբար, սա ավելի է ընդգծում Հայաստանի զգայունությունն այն հարցում, որ որևէ փաստաթուղթ, որը կստորագրվի, պետք է ունենա իրականացման երաշխիքներ, ցանկալի է միջազգային երաշխիքներ»,- ասել է նա:
Փաշինյանը հավելել է, որ սա Հայաստանի ընկալումն է Ադրբեջանի ներկայացրած առաջարկների վերաբերյալ, որը չի կարող հիմնավոր չլինել:
Add new comment