Նեդ Փրայսն անդրադարձել է իրանական ռազմական ինքնաթիռի թռիչքին
ԱՄՆ պետքարտուղարության խոսնակ Նեդ Փրայսը ճեպազրույցում անդրադարձել է իրանական ռազմական ինքնաթիռի սահմանային թռիչքին՝ պատասխանելով «Թուրան» գործակալության հարցին: Պետդեպարտամենտի խոսնակի պաշտոնում Նեդ Փրայսի այս ճեպազրույցը վերջինն է:
«Իրանը վաղուց չարամիտ խաղացող է տարածաշրջանում։ Իրանի ծավալած գործունեությունը սպառնում է և՛ մոտ, և՛ հեռու իր հարևաններին: Մեր մոտեցումն էր ներդրում կատարել Ադրբեջանի, Հայաստանի հետ մեր ներգրավվածության մեջ, Հարավային Կովկասում մեր ներգրավվածության մեջ, որպեսզի ստեղծվի Հարավկովկասյան տարածաշրջան, որն ավելի կայուն է, ավելի քիչ հակված հակամարտությունների ու լարվածության»,- նշել է ԱՄՆ պետդեպի խոսնակը։
Նշենք, որ օրերս Իրանի ռազմաօդային ուժերի օդանավը թռիչք է կատարել Իրան-Ադրբեջան սահմանի երկայնքով։ Բաքուն սա ձևակերպել է որպես «սադրիչ և ոչ բարեկամական» թռիչք:
Իրանի ԱԳՆ խոսնակը, անդրադառնալով ռազմական ինքնաթիռի թռիչքի վերաբերյալ Բաքվի մեղադրանքներին, նշել է, որ դա եղել է սովորական թռիչք, և այդպիսի թռիչքներ պարբերաբար կատարվում են Իրանի սահմանամերձ շրջանների և Իրանի ներքին տարածքում մոնիտորինգի շրջանակում:
Add new comment