Հստակ քաղաքական դիրքորոշում ունեն, որ մեր պահանջները իբր թե ՀՀ ազգային անվտանգության համար սպառնալիք են. Բեգլարյան

Մինչև այսօր տեղի ունեցած զարգացումներն ու գործող իշխանությունների քաղաքական դիրքորոշումները ցույց են տալիս, որ ՀՀ կառավարությունը լուրջ բարեփոխումներ կամ ներառական, արդյունավետ քննարկումներ արցախցիների իրավունքների պաշտպանության համար չի անելու: Այս մասին կառավարության դիմաց տեղի ունեցած նստացույցի, բողոքի ակցիայի ժամանակ լրագրողների հետ զրույցում հայտարարեց Արցախի նախկին պետնախարար Արտակ Բեգլարյանը։

«Հստակ քաղաքական դիրքորոշում ունեն, որ այն պահանջները, որ մենք ներկայացնում ենք, կամ դրա մի մասը իբր թե ՀՀ ազգային անվտանգության համար սպառնալիք են, սակայն ես կասեմ, որ հենց իրենց այդ դիրքորոշումն է սպառնալիք ազգային անվտանգությանը։ Դա վերաբերում է մեր վերադարձին Արցախ, մեր սեփականության, մշակութային ժառանգության պաշտպանությանը, գերիների ազատ արձակմանը և այլն»,- նշեց նա: