Ադրբեջանի ՌՕՈՒ-ն Կասպից ծովում էներգետիկ ենթակառուցվածքների պաշտպանությանն ուղղված զորավարժություններ է անցկացրել

Ընթացիկ տարվա ուսումնական պլանի համաձայն՝ Ադրբեջանի ռազմածովային ուժերը «Ծովային էներգետիկ ենթակառուցվածքների պահպանություն և պաշտպանություն» թեմայով մարտավարական վարժանքներ են անցկացրել մարտական կրակոցներով:

Ըստ «Դետքի»՝ այս մասին հայտնում է Minval.az-ը:

Ադրբեջանի պաշտպանության նախարար Զաքիր Հասանովը հետևել է զորավարժություններիընթացքին:

Նշվում է, որ վարժանքների հիմնական նպատակը հրամանատարների գործնական հմտությունների կատարելագործումն էր օպերատիվ որոշումների կայացման և ծայրահեղ պայմաններում ուժերի կիրառման հարցում:

Զորավարժություններին մասնակցել են մարտական և օժանդակ նավեր, ռազմածովային աջակցության ուժեր, ինչպես նաև ռազմածովային հատուկ նշանակության ուժեր և ծովային հետևակի ստորաբաժանումներ:

Վարժանքների ընթացքում կատարվել են.

-  Կասպից ծովի ադրբեջանական հատվածում էներգետիկ ենթակառուցվածքների պահպանության և պաշտպանության առաջադրանքներ,

-  ափերին և կղզիներում հաջողությամբ կիրառվել են մարտավարական տարրեր՝ հատուկ գործողությունների ընթացքում պայմանական թշնամու ժամանակավոր բազաները հայտնաբերելու և ահաբեկչական խմբավորումները ոչնչացնելու համար, 

-  որոնողափրկարարական և աղետի ենթարկված նավի տարհանման գործողություններ։

Կենդանի կրակով մարտավարական վարժանքներում հատուկ ուշադրություն է դարձվել դժվարին պայմաններում նավերի կառավարմանը, ռազմածովային ուժերի և միջոցների միջև փոխգործակցության կազմակերպմանը, համակարգման և համատեղ գործողությունների կատարելագործմանը։