Գազայում հրադադարի պահպանմանը կհետևի 200 ամերիկացի զինծառայող. Սպիտակ տուն

Մերձավոր Արևելքում արդեն տեղակայված ամերիկյան զորքերը միջազգային առաքելության շրջանակում կհետևեն Գազայի հատվածում հրադադարի համաձայնագրի պահպանմանը։

Այս մասին հայտարարել է Սպիտակ տան մամուլի քարտուղար Քերոլայն Լևիթը։

Պաշտոնյան հերքել է լրատվամիջոցներում տարածված այն տեղեկությունները, թե ԱՄՆ-ն Մերձավոր Արևելք է ուղարկում 200 զինծառայողի։ 

«Սա ճիշտ  չէ, և կտրված է համատեքստից, – գրել է նա X-ում։ – Թույլ տվեք հստակեցնել. ԱՄՆ կենտրոնական հրամանատարությունում (խմբ.՝ գործողությունների տարածքը հիմնականում ներառում է Մերձավոր Արևելքը և Հյուսիսային Աֆրիկան) արդեն տեղակայված մինչև 200 ամերիկացի զինծառայողներ կհսկեն Իսրայելում խաղաղության համաձայնագրի պահպանումը և կհամագործակցեն այնտեղ տեղակայված այլ միջազգային ուժերի հետ»։