Ռուսաստանը Կիևում և Խարկովում բնակելի շենքերի է հարվածել, կան զոհեր և վիրավորներ

Ռուսական անօդաչու թռչող սարքը երեկոյան հարվածել է Կիևի 25-հարկանի բնակելի շենքի, Դատախազության տվյալներով՝ երկու մարդ զոհվել է, ևս յոթը՝ վիրավորվել, հայտնում է «Ազատության» ռուսական ծառայությունը։

Հարձակման հետևանքով հրդեհներ են բռնկվել շենքի երկու հարկերում գտնվող բնակարաններում, ոչնչացվել է առնվազն 12 մեքենա և երկու մոտոցիկլետ։

«Ժամը 21:00-ի դրությամբ հաղորդվել է 59-ամյա կնոջ մահվան մասին։ Տան մոտ գտնվող մեքենայում հայտնաբերվել է ևս մեկ անձի դի»,- ասվում է Դատախազության տարածած հայտարարությունում, ըստ որի՝ յոթ վիրավորների թվում 17-ամյա մի աղջիկ կա։

Ուկրաինայի նախագահ Վլադիմիր Զելենսկին հայտնել է, որ անօդաչու թռչող սարքի հարվածի հետևանքով ինը մարդ է տուժել:

«Սա ևս մեկ ապացույց է, որ Ռուսաստանը պետք է ավելի մեծ ճնշման ենթարկվի։ Հենց նրանք են շարունակում դաժան հարձակումները։ Նրանք են, որ երկարաձգում են պատերազմը։ Նույնիսկ հիմա, ի պատասխան ամերիկյան առաջարկի, նրանք օգտագործում են «Շահեդներ»։ Մենք հույս ունենք, որ Միացյալ Նահանգները կտեսնի Ռուսաստանից եկող այս ազդակները և կգործի վճռականորեն», - գրել է Զելենսկին։

Զելենսկին նաև ասել է, որ ԱՄՆ նախագահ Դոնալդ Թրամփի կողմից էներգետիկ հրադադարի մասին երկու երկրների համաձայնության գալու մասին հայտարարությունից մի քանի ժամ անց Ռուսաստանը հարվածել է Ուկրաինայի վեց էներգետիկ օբյեկտների։