Բերդի զինվորական հոսպիտալի գործունեությունը կդադարեցվի

ՀՀ պաշտպանության նախարարության «Բերդի զինվորական հոսպիտալ» պետական հիմնարկի գործունեությունը կդադարեցվի։ Համապատասխան որոշումն ընդունվեց ՀՀ կառավարության այսօրվա նիստի ժամանակ։

Կառավարությունից նշում են, որ հոսպիտալի փոխարեն Բերդի տարածաշրջանում գործող ՀՀ ՊՆ զորամասերի և ստորաբաժանումների բուժապահովման խնդիրների, զինծառայողների, նրանց հավասարեցված անձանց և նրանց ընտանիքների անդամների բժշկական օգնության և սպասարկման կազմակերպման ապահովումը կվերապահվի «Բերդի բժշկական կենտրոն» ՓԲԸ–ին:

Միաժամանակ, որպես հոսպիտալի գործունեության դադարեցման պայման՝ հանձնարարվել է նախարարությանը՝ ՀՀ առողջապահության նախարարության հետ համատեղ ապահովել Բերդի բժշկական կենտրոնի կողմից Բերդի տարածաշրջանում տեղակայված զորամասերի և այլ ստորաբաժանումների զինծառայողների, նրանց հավասարեցված անձանց և նրանց ընտանիքների անդամների բժշկական օգնության և սպասարկման կազմակերպման, ինչպես նաև զորամասերի և այլ ստորաբաժանումների բժշկական ուղեկցման և բուժկանխարգելիչ միջոցառումների ապահովման համար անհրաժեշտ աշխատանքների իրականացումը։