Ավարտվել է Միրզոյան-Բլինքեն-Բայրամով հանդիպումը
Հայաստանի արտգործնախարար Արարատ Միրզոյանը, ԱՄՆ պետքարտուղար Էնթոնի Բլինքենը և Ադրբեջանի ԱԳ նախարար Ջեյհուն Բայրամովը հանդիպմանը քննարկել են տարածաշրջանում ստեղծված անվտանգային իրավիճակի, երկու երկրների միջև հարաբերությունների կարգավորման գործընթացի հարցեր:
Անդրադարձ է կատարվել Ադրբեջանի կողմից Բերձորի (խմբ.) միջանցքի ապօրինի արգելափակման հետևանքով ստեղծված հումանիտար իրավիճակին:
Ադրբեջանական կողմը հանդիպման ավարտից հետո իր տարածած հաղորդագրության մեջ նշել է, որ քննարկվել են անվտանգության իրավիճակի, Հայաստանի և Ադրբեջանի միջև հարաբերությունների կարգավորմանը վերաբերող հարցեր, Բերձորի միջանցքին չի անդրադարձել։
«ԱՄՆ-ի հանձնառությունն է նպաստել Հարավային Կովկասի խաղաղ, ժողովրդավարական և բարգավաճ ապագային»,- նշել է Պետքարտուղարության բարձրաստիճան պաշտոնյան, որը չի ցանկացել ներկայանալ:
Արդյո՞ք ԱՄՆ-ն իրեն տեսնում է որպես մի երկիր, որը սահմանափակվում է բանակցությունների համար հարթակ տրամադրելով, թե՞ Վաշինգտոնը ծրագրեր ունի հնարավոր ելքի համար:
«Մեր նպատակն է բանակցությունների համար հարթակ տրամադրել: Տեղի են ունեցել երկկողմ բանակցություններ և համատեղ աշխատանք կայուն խաղաղության հասնելու առաջընթացի համար: Մենք շատ ուրախ և հպարտ ենք, որ կարող ենք դա անել Հայաստանի և Ադրբեջանի հետ միասին»,- ադրբեջանական «Թուրան» գործակալության տվյալներով՝ այս մասին հայտնել է Պետքարտուղարության բարձրաստիճան պաշտոնյան:
Add new comment