Չավուշօղլուի խոսքով՝ Թուրքիան ռուս-ուկրաինական պատերազմում խաղաղության հույսն է
Թուրքիայի արտաքին գործերի նախարար Մևլութ Չավուշօղլուն հայտարարել է, որ «Թուրքիան ռուս-ուկրաինական պատերազմում խաղաղության հույսն է»։ Ըստ «Դետք»-ի՝ այս մասին Չավուշօղլուն գրառում է կատարել իր թվիթերյան պաշտոնական էջում։
Թուրքիայի արտաքին գործերի նախարարը նշել է, որ Անկարայի և ՄԱԿ-ի աջակցությամբ հաջողվել է իրականացնել Ստամբուլի հացահատիկային համաձայնագիրը և կանխել համաշխարհային պարենային ճգնաժամը։
Նա հիշեցրել է, որ պատերազմի մեկնարկից հետո Անթալիայում կայացած դիվանագիտական ֆորումի շրջանակում թուրքական կողմը կազմակերպել է Ռուսաստանի և Ուկրաինայի ներկայացուցիչների առաջին հանդիպումը։
Չավուշօղլուն ասել է, որ Անկարան ապահովել է Ուկրաինայի և Ռուսաստանի միջև գերիների փոխանակման կայացումն ու նպաստել Ռուսաստանի ատոմային էներգիայի պետական գործակալության (Ռոսատոմ) և ՄԱԳԱՏԷ-ի միջև շփումների կայացմանը։ Նա հավելել է, որ Թուրքիան ուշադիր հետևում է Մոնտրոյի կոնվենցիային։
#Դետքի_հետագծով
Ռուս-ուկրաինական պատերազմի մեկնարկից ի վեր Թուրքիան վարում է չափազանց հավասարակշռված արտաքին քաղաքականություն և կարողանում է ստեղծված իրավիճակից առավելագույն օգուտ քաղել։
Ներկայումս ստեղծվել է մի իրավիճակ, երբ Թուրքիայի նախագահ Էրդողանն այն եզակի քաղաքական դերակատարներից է, որը բանակցություններ է վարում ինչպես Ռուսաստանի, այնպես էլ Ուկրաինայի իշխանությունների հետ։ Միևնույն ժամանակ վերջինս իր այդ դիվանագիտական հաջողությունը փորձում է առավելագույնս կապիտալիզացնել Թուրքիայում ընթացող նախընտրական քարոզարշավի շրջանակում։
Add new comment