Հայաստանը վերահաստատում է բրյուսելյան պայմանավորվածությունը և ակնկալում, որ Ադրբեջանն էլ կվերահաստատի այն. Փաշինյան

«Ես հիմա այս ամբիոնից վերահաստատում եմ, որ ՀՀ-ն վերահաստատում է Բրյուսելում արձանագրված պայմանավորվածությունը, որ Հայաստանի Հանրապետությունը ճանաչում է Ադրբեջանի 86.600 քառակուսի կիլոմետրը, և ակնկալում եմ, որ Ադրբեջանն էլ կվերահաստատի, որ ճանաչում է Հայաստանի 29.800 քառակուսի կմ-ը»,- ասել է Փաշինյանը՝ արձագանքելով ԱԺ ՔՊ խմբակցության պատգամավոր Հռիփսիմե Գրիգորյանի հարցին։

Արձագանքելով քննադատություններին՝ նա նշել է, որ տարածքային ամբողջականությունը ճանաչվել է դեռ Ալմա Աթայի հռչակագրով, և պատասխանել հարցին, թե ինչու է այսօր Հայաստանը ճանաչում այն կրկին ու կոնկրետ չափ նշում:

«Առաջինը՝ ճանաչել ենք 1991 թվականի Ալմա Աթայի հռչակագիրը, երկրորդը՝ վերահաստատումն է Պրագայում Ալմա Աթայի հռչակագրի, երրորդ քայլը տարածքների կոնկրետ նշագրմամբ փոխադարձ ճանաչումն է Բրյուսելում: Հաջորդ քայլը՝ պետք է քարտեզի վրա ցույց տանք, որոշենք՝ որ քարտեզն է, որ արտահայտում է այդ տարածքը: Ընդ որում՝ այստեղ էլ ենք մի քիչ կիսաքայլ արել: Այստեղ մենք վերցնում ենք Խորհրդային միության քարտեզները: Մեր դիրքորոշումն այն է, որ դրա համար հիմք պետք է ծառայեն 1975 թվականի Խորհրդային միության գլխավոր շտաբի քարտեզները, և պիտի ասեմ, ոնց որ թե հիմա կամաց-կամաց սա ոչ միայն մեր դիրքորոշումն է, այլև միջազգային էլի գործընկերներ սկսում են այդ խոսույթը որդեգրել և օգտագործել, ինչը ես համարում եմ շատ կարևոր»,- ասել է Փաշինյանը: