Իրանի զինված ուժերը գտնվում են մարտական պատրաստվածության ամենաբարձր մակարդակի վրա
Իրանի Իսլամական Հանրապետության բանակի գլխավոր հրամանատար Աբոլրահիմ Մուսավին հայտարարել է, որ երկրի զինված ուժերը լիովին պատրաստ է և ի վիճակի է պահպանելու երկրի անկախությունն ու տարածքային ամբողջականությունը։ Ըստ «Դետք»-ի՝ այս մասին տեղեկացնում է իրանական պետական IRNA լրատվական գործակալությունը։
Մուսավին շեշտել է՝ ներկայումս իրանական զինված ուժերը գտնվում է պատրաստվածության ամենաբարձր մակարդակի վրա, և նրա ստորաբաժանումները՝ ցամաքային, օդային և ջրային, համագործակցում են միմյանց հետ։ Նրա խոսքով՝ ցանկացած առաքելություն, որը կցանկանա իրականացնել զինված ուժերի գլխավոր հրամանատարը, կկատարվի հնարավորինս սեղմ ժամկետներում:
«Փաստացի բանակը լիովին ի վիճակի է պաշտպանելու երկրի անկախությունն ու տարածքային ամբողջականությունը և կարող է ամբողջ ուժով կատարել իր պարտականությունները ցանկացած պահի և ցանկացած ոլորտում»,- ասել է նա։
Իրանի բանակի գլխավոր հրամանատարը նշել է, որ առաջատար տեխնոլոգիաների հարցում երկիրը մեկ քայլ առաջ է իր բոլոր թշնամիներից։ Նա ասել է, որ Իրանը երբեք չի դադարի առաջ շարժվելուց և ի հեճուկս խիստ պատժամիջոցների՝ մեծ առաջընթաց է գրանցել թվաքանակի ու մարտունակության բարձրացման հարցում։
#Դետքի_հետագծով
Իրանի Իսլամական Հանրապետությունը կարևորում է սեփական զինված ուժերի մարտունակության բարձրացումը և զինված ուժերի տարբեր ստորաբաժանումների միջև փոխգործակցության ամրապնդումը։ Իրանական կողմն այս շրջանակում հստակ քայլեր է ձեռնարկում նաև ժամանակակից սպառազինության արտադրության և ձեռքբերման ուղղությամբ։
Add new comment