Իրանը և Եգիպտոսը հանձնաժողով կստեղծեն հարաբերությունները վերականգնելու համար
Իրանի Իսլամական Հանրապետությունը և Եգիպտոսը նախնական համաձայնություն են ձեռք բերել հարաբերությունների վերականգնման կոմիտեի ձևավորման և անվտանգության ոլորտում համակարգման մասին։ Ըստ «Դետք»-ի՝ այս մասին տեղեկացնում է իրանական կառավարամետ «Mehr» լրատվական գործակալությունը։
Հաղորդվում է, որ եգիպտա-իրանական հարաբերությունների նկատելի լիցքաթափումը հնարավոր է դարձնում Կահիրեի և Թեհրանի երկկողմ հարաբերությունների կարգավորումը։
Միևնույն ժամանակ լրատվամիջոցն այլ մանրամասներ չի հայտնում։
Ավելի վաղ Իրանի գերագույն առաջնորդ Ալի Խամենեին և արտաքին գործերի նախարար Հոսեյն Ամիր Աբդոլլահիանը ողջունել էին Թեհրանի և Կահիրեի միջև հարաբերությունների զարգացումը։
Հիշեցնենք, որ Իրանն ու Եգիպտոսը չորս տասնամյակ է, ինչ խզել են դիվանագիտական հարաբերությունները, երբ Եգիպտոսի իշխանությունները 1979-ին Իսրայելի հետ ստորագրեցին Քեմփ Դեյվիդի խաղաղության պայմանագիրը:
Add new comment