Ուկրաինայի և Իսրայելի պաշտպանության նախարարները քննարկել են «Իրանից բխող ընդհանուր սպառնալիքը»
Իսրայելի պաշտպանության նախարար Յոավ Գալանտը հունիսի 21-ին հեռախոսազրույց է ունեցել Ուկրաինայի պաշտպանության նախարար Ալեքսեյ Ռեզնիկովի հետ։ Ըստ «Դետք»-ի՝ այս մասին տեղեկացնում է իսրայելական «The Jerusalem Post» պարբերականը։
Հաղորդվում է, որ հեռախոսազրույցի ընթացքում կողմերը քննարկել են ուկրաինական ռազմաճակատում ստեղծված իրավիճակը և դրա վրա Իրանի ենթադրյալ ազդեցությունը։ Ռեզնիկովը Գալանտին իրազեկել է տեղի ունեցող զարգացումների մասին և մտահոգություն հայտնել Ուկրաինայում հումանիտար իրավիճակի վերաբերյալ։
Բացի դրանից՝ կողմերը քննարկել են Իրանից բխող համատեղ սպառնալիքը և դրա ազդեցությունն ուկրաինական պատերազմի վրա», ինչպես նաև դրա ավելի լայն՝ գլոբալ հետևանքները։
Գալանտը զրուցակցին տեղեկացրել է նաև քաղաքացիական օդային հարձակման նախազգուշացման համակարգի տեղակայման առաջընթացի մասին, որի ստեղծմանն օգնում են իսրայելցի մասնագետներն Ուկրաինայում։
#Դետքի_հետագծով
Ուկրաինայի իշխանությունները փորձում են ամեն կերպ Իսրայելից ռազմական աջակցություն ստանալ, քանի որ իսրայելական արտադրության սպառազինությունը կարող է նպաստել ռազմաճակատում ուկրաինական կողմի հաջողություններին։ Այս համատեքստում Ուկրաինան փորձում է շահարկել Իրանի և Իսրայելի միջև առկա թշնամանքը, քանի որ պարբերաբար հայտարարում է, որ Իրանը Ռուսաստանին անօդաչու թռչող սարքեր է մատակարարում։
Մինչդեռ Իսրայելը ռուս-ուկրաինական պատերազմի մեկնարկից ի վեր բավականին զգուշավոր չեզոքության քաղաքականություն է վարում, քանի որ Ռուսաստանի հետ լավ հարաբերություններ ունի և չի ցանկանում վտանգել դրանք, ուստի հրաժարվում է Ուկրաինային ռազմական օգնություն տրամադրելուց, ինչն առաջացնում է Կիևի դժգոհությունը։
Add new comment