«Մեկ ազգ, երկու պետություն» կարգախոսը վերածվել է «մեկ ազգ, երեք պետություն» կարգախոսի. Թուրքիայի խորհրդարանի նախագահ
«Մեկ ազգ, երեք պետությունն այն խնդիրն է, որը մենք երկար ժամանակ բարձրաձայնում ենք։ Սա այցի կարևոր իրադարձություններից մեկն էր: Դա կարճ, բայց շատ արդյունավետ այց էր»,- այս մասին Թուրքիայի խորհրդարանի նախագահ Նուման Քուրթուլմուշն ասել է Հյուսիսային Կիպրոսի Թուրքական Հանրապետություն և Ադրբեջան կատարած այցի արդյունքների վերաբերյալ։
Նա ասել է, որ թուրք-ադրբեջանական հարաբերություններում «մեկ ազգ, երկու պետություն» վաղեմի գաղափարը վերածվել է «մեկ ազգ, երեք պետություն» հասկացության։
Ն. Քուրթուլմուշն ասել է, որ որպես խորհրդարանի նախագահ իր առաջին այցը կատարել է Ադրբեջան և Հյուսիսային Կիպրոս։
«Մենք կարծում ենք, որ այն հնարավորությունները, որ ունեն և՛ Թուրքիան, և՛ Ադրբեջանը, կլինեն ի շահ թյուրքական աշխարհի։ Մենք խոսել ենք նախագահ Իլհամ Ալիևի հետ Հյուսիսային Կիպրոսի Թուրքական Հանրապետության միջազգային ճանաչման վերաբերյալ։ Այս առումով ճանաչման գործընթացը պետք է աստիճանաբար որոշակի քայլերով հասցնել միջազգային հարթություն»,- նշել է նա։
Հիշեցնենք, որ Ն.Քուրթուլմուշը խորհրդարանական պատվիրակության հետ Ադրբեջան էր այցելել հուլիսի 11-ին։ Նա մասնակցել է նախագահ Իլհամ Ալիևի ընդունելությանը, հանդիպել Ադրբեջանի խորհրդարանի նախագահ Սահիբա Գաֆարովայի, վարչապետ Ալի Ասադովի, ինչպես նաև այլ պաշտոնյաների հետ։
#Դետքի_հետագծով
Հյուսիսային Կիպրոսի Թուրքական Հանրապետությունը ճանաչված է միայն Թուրքիայի կողմից։ Թուրքիան օկուպացնում է այս տարածքը, որը զավթել է Կիպրոսի Հանրապետությունից՝ 1974 թվականի ներխուժման ժամանակ։
Add new comment