Իսրայելը 2023 թվականի սկզբից 4400 պաղեստինցի է ձերբակալել

Պաղեստինցի բանտարկյալների աջակցության ակումբը հայտնել է, որ այս տարվա սկզբից Իսրայելի վարչակազմի կողմից ձերբակալված պաղեստինցիների թիվը հասել է ավելի քան 4400 մարդու։ Ըստ «Դետք»-ի՝ այս մասին տեղեկացնում է իրանական պետական IRNA լրատվական գործակալությունը։

Հաղորդվում է, որ ձերբակալվածների թվում կան 619 երեխա և 78 կին։ 

Հայտարարության համաձայն՝ այս տարի սիոնիստական ​​ռեժիմը մոտ 2000 ձերբակալման հրաման է արձակել Պաղեստինի քաղաքացիների նկատմամբ, ինչը պաղեստինցիների դեմ հանցագործությունների օրինակ է։

Պաղեստինի բանտարկյալների ակումբն ընդգծել է, որ այս տարի արձանագրվել է ոչ միայն ձերբակալությունների թվի աճ, այլև կալանավորների դեմ կատարված բոլոր տեսակի հանցագործությունների ակտիվացում։ Ակումբն ուշադրություն է հրավիրել այն բանին, որ դա վկայում է այն մասին, որ նման հանցագործություններով սիոնիստական ​​ռեժիմը փորձում է ոչնչացնել ցանկացած դիմադրություն և պայքար իր օկուպացիոն ռեժիմի դեմ: 

#Դետքի_հետագծով

Վերջին շրջանում իսրայելա-պաղեստինյան հակամարտությունը կրկին սրվել է, իսկ Իսրայելի իշխանությունները մեծացրել են ճնշումները պաղեստինցիների նկատմամբ։ Այս ճնշումների վկայությունն է նաև ձերբակալությունների թվի աճը, որը նույնպես նպաստում է լարվածության մեծացմանը։