Թեհրանը Վաշինգտոնի հետ ձեռք բերած համաձայնությունը վերջինիս համար փորձություն է համարում
Պաշտոնական Թեհրանն իրանական ակտիվների ապասառեցման հարցում Վաշինգտոնի հետ ձեռք բերված համաձայնությունը վերջինիս համար փորձություն է համարում։ Ըստ «Դետք»-ի՝ այս մասին տեղեկացնում է իրանական կառավարամետ «Mehr» լրատվական գործակալությունը։
Մասնավորապես Իրանի Իսլամական Հանրապետության արտաքին գործերի նախարար Հոսեյն Ամիր Աբդոլլահիանը հայտնել է, որ իրանական սառեցված ակտիվների ազատումը համարվում է արժանի դիվանագիտության մաս։ «Հարավային Կորեայից մեր միջոցների ազատումն ու փոխանցումը մեր արժանի դիվանագիտության մի մասն են։ Այս համաձայնագիրը ևս մեկ փորձություն է ԱՄՆ-ի համար»,- ասել է նա։
Աբդոլլահիանը շեշտել է՝ Թեհրանը շարունակում է պատժամիջոցները չեղարկելու և բոլոր կողմերին Իրանի առաջ ստանձնած միջազգային պարտավորություններին վերադարձնելու ջանքերը: Նրա խոսքով՝ իրանական ակտիվների ապասառեցումը կնպաստի բանակցային գործընթացքի առաջ մղմանը։
Հիշեցնենք, որ օգոստոսի 10-ին մեկնարկել է իրանական սառեցված ակտիվների ազատման և Իրանի ու ԱՄՆ-ի միջև բանտարկյալների փոխանակման գործընթացը։ Այս պայմանավորվածությունը ձեռք է բերվել շուրջ երկու տարի տևած անուղղակի բանակցություններից հետո։
#Դետքի_հետագծով
Իրանի և ԱՄՆ-ի միջև անուղղակի բանակցությունների արդյունքում վերջերս պայմանավորվածություն ձեռք բերվեց՝ կապված իրանական արգելափակված ակտիվների ապասառեցման հետ։ Այս միջոցները կարևոր նշանակություն ունեն Իրանի համար, որոնք երկիրը կարող է օգտագործել առկա տնտեսական խնդիրները լուծելու նպատակով։
Add new comment