ԿԽՄԿ-ն հումանիտար օգնություն է տեղափոխել Արցախ Բերձորի միջանցքով և Ակնայի ճանապարհով
Սեպտեմբերի 18-ին Կարմիր խաչի միջազգային կոմիտեն Բերձորի միջանցքով և Ակնայի ճանապարհով ալյուր և բժշկական կարևոր պարագաներ է հասցրել Արցախում կարիքի մեջ գտնվող անձանց։ Այս մասին հայտարարություն է տարածել ԿԽՄԿ-ն։
Նշվում է, որ սա հնարավոր է դարձել «որոշում կայացնողների միջև հումանիտար փոխհամաձայնության հասնելու դիվանագիտական ջանքերի շնորհիվ»։
«Մեզ մեծապես մխիթարում է այն, որ շատ մարդիկ, որոնք ապավինում են մարդասիրական օգնությանը, առաջիկա օրերին վերջապես կստանան այդքան անհրաժեշտ աջակցությունը։ Առողջապահական կառույցները չունեն բժշկական պարագաներ: Մարդիկ հացի համար ժամերով հերթ են կանգնում: Նրանք կանոնավոր մարդասիրական առաքումների միջոցով կայուն օգնության կարիք ունեն: Այս կոնսենսուսը մեր թիմերին թույլ է տվել վերսկսել այս կյանքեր փրկող աշխատանքը»,- ասել է ԿԽՄԿ Եվրոպայի և Կենտրոնական Ասիայի տարածաշրջանային տնօրեն Արիան Բաուերը:
Հայտարարության մեջ ասվում է, որ ԿԽՄԿ-ն վերջին շաբաթներին բանակցություններ էր վարում «որոշում կայացնողների հետ»՝ քննարկելով տարբեր ճանապարհներով տարածաշրջան օգնություն հասցնելու տարբերակները, այդ թվում՝ Բերձորի միջանցքով և Ակնայի ճանապարհով։
«Երկուշաբթի օրվա գործողությունը ներառում է երկու բեռնատար, որոնք միաժամանակ ապրանքներ են մատակարարել Լաչինի միջանցքով և Աղդամի ճանապարհով»,- նշված է հայտարարությունում։
ԿԽՄԿ-ի տարածաշրջանային տնօրենը հույս է հայտնել, որ հումանիտար բեռի մատակարարումները շարունակական կլինեն․ «Հուսով եմ, որ այս կոնսենսուսը թույլ կտա, որ մեր խիստ հումանիտար շարասյուները վերսկսեն մատակարարումները ոչ միայն այսօր, այլև հաջորդ շաբաթներին, որպեսզի մենք կարողանանք կանոնավոր օգնություն հասցնել նրանց, ովքեր դրա կարիքն ունեն: Մեր նպատակն է հասնել նրանց, ովքեր օգնության կարիք ունեն՝ չեզոքության, անկողմնակալության և անկախության մեր հիմնարար սկզբունքներին համապատասխան»։
Add new comment