Ադրբեջանի Միլլի մեջլիսում քննարկվել է Ֆրանսիայի կողմից Հայաստանին զինելու հարցը
Հոկտեմբերի 24-ին Ադրբեջանի Միլլի մեջլիսի պատգամավոր Թուրալ Գանջալիևը, ելույթ ունենալով խորհրդարանի լիագումար նիստում, մեղադրական խոսքեր է հնչեցրել Ֆրանսիայի հասցեին։
«Վերջին շրջանում Հարավային Կովկասում Ֆրանսիայի ագրեսիվ քաղաքականության նոր դրսևորումներ են նկատվում»,- ասել է պատգամավորը։ Նրա խոսքով՝ Ֆրանսիայի և Հայաստանի միջև ռազմական ոլորտում համագործակցության մասին նախապես ստորագրված համաձայնագիրը նպատակ ունի խախտելու տարածաշրջանում «փխրուն հավասարակշռությունը»։
«Այս համաձայնագիրն ուղղված է նաև Ադրբեջանի ազգային անվտանգության դեմ»,- ասել է պատգամավորը։
Գանջալիևը նշել է, որ Ֆրանսիան շարունակում է վարել գաղութատիրական քաղաքականություն՝ դրան տալով նոր ձև. «Մենք պետք է աջակցենք այս բռնությունից տուժած ժողովուրդներին։ Բացի դրանից՝ մենք պետք է դատապարտենք Ֆրանսիայի ագրեսիվ քաղաքականությունը միջազգային կազմակերպությունների միջոցով»։
Միլլի մեջլիսի պատգամավոր Էլման Նասիրովն իր հերթին ընդգծել է, որ Ֆրանսիայի և Հայաստանի միջև այս համաձայնագիրն ապագայում կարող է «լուրջ սպառնալիքներ առաջացնել տարածաշրջանում»։
Add new comment