Իրանը Իսրայելի դեմ Միջազգային քրեական դատարանում հայց կներկայացնի
Իրանի Իսլամական Հանրապետության արտաքին գործերի նախարարության մամուլի խոսնակ Նասեր Քանաանին հայտարարել է, որ Թեհրանը նախատեսում է Միջազգային քրեական դատարանում Իսրայելի դեմ հայց ներկայացնել՝ Գազայի հատվածում վերջինիս իրականացրած գործողությունների համար։ Ըստ «Դետք»-ի՝ այս մասին հայտնում է իրանական պետական IRNA լրատվական գործակալությունը։
Քանաանին նշել է, որ իրավական և միջազգային բազմաթիվ փորձագետների կարծիքով՝ Իսրայելը Գազայում մի շարք ռազմական հանցագործություններ է կատարել։
«Իսլամական համագործակցության կազմակերպությանն ուղղված իր առաջարկում Իրանը կոչ է արել ստեղծել հանձնաժողով, որը կմշակի այս փաստաթղթերը միջազգային դատարաններին` ներառյալ Միջազգային քրեական դատարանին ներկայացնելու համար։ Մենք հուսով ենք, որ Միջազգային քրեական դատարանն իր ներհատուկ առաքելության մեջ կապացուցի, որ գործում է անաչառ և արդարացի ու միջոցներ կձեռնարկի ռազմական հանցագործներին դատարանի առաջ կանգնեցնելու համար»,- ասել է իրանցի պաշտոնյան։
Ըստ Իրանի ԱԳՆ-ի մամուլի խոսնակի` երկրի արտաքին գործերի նախարարության ղեկավար Հոսեյն Ամիր Աբդոլլահիանը վերջերս Ժնև կատարած այցի ժամանակ ՄԱԿ-ի ներկայացուցիչների հետ հանդիպմանը բարձրացրել է այդ հարցը և շեշտել, որ Իրանն ուշադիր հետևելու է դրան:
#Դետքի_հետագծով
Իսրայելը Գազայի հատվածում իրականացվող ռազմական բախումների ընթացքում բազմաթիվ գործողություններ է կատարել, որոնք Թեհրանի և իր դաշնակից պետությունների կողմից որակվում են որպես հանցագործություններ։ Իրանի իշխանությունները ձգտում են նաև օգտագործել Միջազգային քրեական դատարանի հնարավորությունները՝ Իսրայելի վարչակարգին պատասխանատվության ենթարկելու և պատերազմը դադարեցնելու համար։
Add new comment