«Ռուսաստանը չի վերադառնա Եվրոպայի խորհուրդ». ՌԴ ԱԳՆ նախարարի տեղակալ
Ռուսաստանի արտաքին գործերի նախարարի տեղակալ Ալեքսանդր Գրուշկոն ասել է, թե Եվրոպայի խորհուրդն այլևս այն կազմակերպությունը չէ, որի նպատակն է հասնել եվրոպական ժողովուրդների միասնությանը, հետևաբար, Ռուսաստանն այդ կառույց չի վերադառնա: Այդ մասին փոխնախարարն ասել է «Պառլամենտսկայա գազետա» թերթին տված հարցազրույցում:
«Նշեմ, որ ըստ Եվրոպայի խորհրդի Կանոնադրության առաջին հոդվածի, կազմակերպությունը ստեղծվել է եվրոպական ժողովուրդների «միասնության հասնելու» համար: Արևմուտքի ջանքերով, այն այժմ լրիվ հակառակն է անում: Այդպիսի կազմակերպություն, որը վերածվել է Եվրամիության յուրօրինակ «հանդերձարանի», վերադառնալ չի կարելի նույնիսկ անսահման երևակայություն ունենալու դեպքում», - ասել է Գրուշկոն:
Ավելի վաղ Ռուսաստանի նախագահ Վլադիմիր Պուտինը Գրուշկոյին նշանակել է խորհրդարանում Կրեմլի պաշտոնական ներկայացուցիչ, որը պետք է մասնակցի Ռուսաստանի վերաբերյալ Եվրոպայի խորհրդի միջազգային պայմանագրերի չեղարկման հարցով քննարկումներին:
Հիշեցնենք, որ Ռուսաստանը Եվրոպայի խորհրդից դուրս է եկել 2022 թվականի մարտին: Ռուսաստանի արտաքին գերատեսչությունն այն ժամանակ պարզաբանել է, թե «ՆԱՏՕ-ի և Եվրամիության երկրները չարաշահում են Եվրոպայի խորհրդում իրենց մեծամասնությունը և հետևողականորեն այդ կազմակերպությունը դարձնում են հակառուսական քաղաքականության գործիք, հրաժարվում են հավասար երկխոսությունից և այն բոլոր սկզբունքներից, որոնց հիման վրա ստեղծվել է այս համաեվրոպական կառույցը»:
Add new comment