Իրաքյան Քուրդիստանը երբեք Իրանի դեմ սպառնալիքի աղբյուր չի լինի
Իրաքյան Քուրդիստանի ղեկավար Նեչիրվան Բարզանին հայտարարել է, որ Իրաքյան Քուրդիստանը երբեք Իրանի Իսլամական Հանրապետության դեմ սպառնալիքների հարթակ չի դառնա։ Ըստ «Դետք»-ի՝ այս մասին տեղեկացնում է իրանական կառավարամետ «Mehr» լրատվական գործակալությունը։
Հաղորդվում է, որ Բարզանին այցելել է Քուրդիստանի մայրաքաղաք Էրբիլում Իրանի գլխավոր հյուպատոսություն՝ իր ցավակցությունները հայտնելու Իրանի ժողովրդին և ղեկավարությանն անցյալ շաբաթ տեղի ունեցած ահաբեկչությունների կապակցությամբ, որոնց հետևանքով առնվազն 90 մարդ է զոհվել։ «Մենք բազմիցս ասել ենք և այսօր ևս մեկ անգամ կրկնում ենք, որ երբեք սպառնալիքի աղբյուր չենք լինի մեր հարևաններից որևէ մեկի, հատկապես Իրանի Իսլամական Հանրապետության համար»,- նշել է նա։
Բարզանին Էրբիլում Իրանի հյուպատոսության պաշտոնյաներին ասել է, որ ահաբեկչությունը արմատախիլ անելու համար տարածաշրջանում համագործակցության ընդլայնման անհրաժեշտություն կա: Նա նաև բարձր է գնահատել Իրաքին և Քուրդիստանին Իրանի ցուցաբերած օգնությունը «Իսլամական պետության» ահաբեկիչների դեմ պայքարում։
«Իրանը շատ է օգնել Իրաքին և Քուրդիստանին այն ժամանակ, երբ ԻՊ-ն հայտնվել և մեծացրել էր իր հզորությունը»,- ասել է Բարզանին:
Հիշեցնենք, որ 2023-ի մարտին Իրանը և Իրաքը ստորագրեցին անվտանգության մեծ պայմանագիր, որի համաձայն` Բաղդադի կենտրոնական կառավարությունը խոստացավ արմատախիլ անել ահաբեկչական գործողությունները, որոնք ուղղված են Իրանի տարածքին։ Իրանի իշխանությունները Բաղդադի կենտրոնական կառավարության պաշտոնյաներին և քուրդ պաշտոնյաներին կոչ են արել ավելին անել, որպեսզի ահաբեկիչները և նրանց բազաներն ամբողջությամբ տեղափոխվեն Իրանի սահմանին մոտ գտնվող տարածքներից:
Add new comment