Սյունիքը աշխարհաքաղաքական առումով շատ կարևոր մարզ է. Ճապոնիայի դեսպան
Սյունիքի մարզպետ Ռոբերտ Ղուկասյանն ընդունել է ՀՀ-ում Ճապոնիայի նորանշանակ արտակարգ և լիազոր դեսպան Աոկի Յուտակային, հայտնում են Սյունիքի մարզպետարանից: Ռոբերտ Ղուկասյանը շնորհավորել է դեսպանին Հայաստանում իր դիվանագիտական առաքելությունը ստանձնելու կապակցությամբ, ողջունել նրա առաջին այցը Սյունիքի մարզ՝ կարևորելով հայ-ճապոնական բարեկամական հարաբերությունները։
Մարզպետը նշել է, որ Ճապոնիայի դեսպանատան հետ համատեղ արդյունավետ աշխատանք կա, ու շնորհակալություն հայտնեց մարզում իրականացված ծրագրերի և ներդրումների համար։
Դեսպանն ասել է, որ Սյունիքը աշխարհաքաղաքական առումով շատ կարևոր մարզ է։ Բարձրաստիճան դիվանագետը փոխանցել է նաև, որ իր առաքելությունն է շարունակել ամրացնել երկու երկրների բարեկամական հարաբերությունները, և ինքը շատ է ուզում, որ ճապոնացիներն ավելի լավ ճանաչեն Հայաստանն ու հայերին։
Նշվել է, որ դրա իրագործման համար լավ սկիզբ կարող է լինել երկկողմ զբոսաշրջության զարգացումը։
Կողմերը սերտ համագործակցությունը շարունակելու պատրաստակամություն են հայտնել ու քննարկել են երկուստեք հետաքրքրություն ներկայացնող հարցեր։
Հանդիպման ընթացքում խոսվել է նաև ԼՂ-ից բռնի տեղահանված անձանց աջակցելուն ուղղված ծրագրերի (որոնցում դեսպանատունը ներդրում ունի), տարածաշրջանում երկարատև խաղաղության հաստատման կարևորության մասին։
Add new comment