Իսրայելի վրա Իրանի հարձակումից հետո իրավիճակը տարածաշրջանում փոխվել է. Իրանի ԳՇ պետ

Իրանի Իսլամական Հանրապետության զինված ուժերի գլխավոր շտաբի պետ Մոհամմադ Բաղերին հայտարարել է, որ ապրիլի 13-ին Իսրայելի վրա Իրանի պատասխան հարվածից հետո տարածաշրջանում իրավիճակը փոխվել է։ Ըստ «Դետք»-ի՝ այս մասին տեղեկացնում է իրանական կառավարամետ «Mehr» լրատվական գործակալությունը։

«Իրավիճակը տարածաշրջանում փոխվել է իսրայելական կարևորագույն բազաների դեմ Իրանի պատասխան և պատժիչ գործողություններից հետո»,-  ասել է իրանցի բարձրաստիճան զինվորականը նախօրեին կայացած արարողության ժամանակ։

Բաղերին բարձր է գնահատել Իսրայելի դեմ «Ճշմարիտ խոստում» գործողության իրականացման ժամանակ իրանցի զինվորականների ցուցաբերած ջանքերը։ Նրա խոսքով՝ գործողությունը ռազմավարական հետևանքների է հանգեցրել տարածաշրջանային և միջազգային ասպարեզում։

Հիշեցնենք, որ ապրլի 13-ին Իրանը հարձակում է իրականացրել Իսրայելի վրա՝ ի պատասխան ապրիլի 1-ին Դամասկոսում Իրանի հյուպատոսության վրա իսրայելական հարվածի։ Այս հարվածի հետևանքով զոհվել էր Իրանի Իսլամական հեղափոխության պահապանների կորպուսի 7 ռազմական խորհրդական։