Հայաստանի պատմության մեջ այդպիսի խայտառակ դրվագ դեռ տեղի չի ունեցել. Բագրատ Սրբազանը՝ Արարատ Միրզոյանին
ՀՀ արտաքին գործերի նախարար Արարատ Միրզոյանը «դասալիքներ» է անվանել այն դիվանագետներին, որոնք միացել են «Տավուշը հանուն հայրենիքի» շարժմանն ու կազմել են սահմանազատման և տարածաշրջանում խաղաղություն հաստատելու հայեցակարգը: «Դասալիքներն են, որ լքեցին իրենց պաշտոնը, իրենց բաժին հասած խրամատն այն օրերին, երբ Հայաստանի Հանրապետության սուվերեն տարածքի վրա տեղի էր ունենում ռազմական ագրեսիա»,- հայտարարել է Արարատ Միրզոյանը:
Ի պատասխան Միրզոյանի այս հայտարարության՝ այսօր լրագրողների հետ զրույցում Տավուշի թեմի առաջնորդ Բագրատ Սրբազանը նշել է՝ դեռ հարց է, թե ովքեր են լքել խրամատը և ինչո՞ւ:
Բագրատ Սրբազանը հիշեցրեց 2023-ի սեպտեմբերին, Արցախի հայաթափումից հետո, ՄԱԿ-ում տեղի ունեցող անվտանգության խորհրդի նիստում կատարվածը: «Արարատ Միրոզյանն ասում էր մի բան, իսկ Ադրբեջանի արտգործնախարարը նրան հերքում էր` Հայաստանի վարչապետի խոսքերով: Ուրիշ բան չեմ ասում ես: Թող միայն դա հիշեն: Մնացած ձախողումների մասին չեմ խոսում: Հայաստանի պատմության մեջ այդպիսի խայտառակ դրվագ դեռ տեղի չի ունեցել: ՄԱԿ-ի նման կարևոր ամբիոնում այդպես մերժվել»,- նշեց ՀԱԵ Տավուշի թեմի առաջնորդը:
Ինչ վերաբերում է շարժման առաջարկած հայեցակարգին, ապա, ըստ Բագրատ Սրբազանի, ինքը դրա մասին որևէ մեկնաբանություն չի կարող ներկայացնել, քանի որ այն կազմել են դիվանագետները, նրանք էլ պետք է մեկնաբանեն։
Նշենք, որ շարժմանը միացած դիվանագետների թվում են նախկին արտգործնախարար Արա Այվազյանը, նախկին փոխնախարար Ավետ Ադոնցը, ԱԳՆ նախկին գլխավոր քարտուղար Վահագն Մելիքյանը: Նրանք սահմանազատման ու սահմանագծման գործընթացը որակում են ոչ լեգիտիմ և հակասահմանադրական:
Add new comment