Ալմաթիի հանդիպումը մի քայլ առաջ է խաղաղության ճանապարհին. Գալուզին

ՌԴ փոխարտգործնախարար Միխայիլ Գալուզինը «News.ru»-ին տված հարցազրույցում խոսել է  հայ-ադրբեջանական կարգավորման գործընթացից:

«Մենք ողջունում ենք մայիսի 10-ին և 11-ին Ալմաթիում խաղաղության պայմանագրի շուրջ Բաքվի Հանրապետության (խմբ.) և Հայաստանի արտգործնախարարների միջև բանակցությունների անցկացումը։ Եվս մեկ քայլ է արվել Հարավային Կովկասում հուսալի և երկարաժամկետ խաղաղության և կայունության հասնելու ուղղությամբ։ Մենք լիովին աջակցում ենք Աստանայի ջանքերին այս ուղղությամբ։ Եթե ​​նայենք պատմությանը, Ղազախստանը զգալի ներդրում է ունեցել 1991 թվականի սեպտեմբերին Ժելեզնովոդսկի հռչակագրի մշակման և ընդունման գործում՝ դառնալով Լեռնային Ղարաբաղի հակամարտության գոտում ռազմական առճակատումը դադարեցնելու առաջին լուրջ փորձերից մեկը»,- ասել է նա։

Գալուզինը կարևորել է 2020-2022 թվականների եռակողմ համաձայնագրերը, որոնք, ըստ նրա, որոշեցին Բաքվի և Երևանի հարաբերությունների կարգավորման ճանապարհային քարտեզը:

«Բոլորովին վերջերս Երևանի նկատմամբ ԵՄ-ի ներկայության կարգավիճակի մասին համաձայնագիր կնքվեց՝ նրան տրամադրելով առավել բարենպաստ վերաբերմունք և Հայաստանի տարածքում գործելու ազատություն: Այն փաստը, որ առաքելությունը ԵՄ հիբրիդային պատերազմի գործիք է, հաստատում է դրա գաղտնիությունը, հաշվետվողականության բացակայությունը և վերահսկողության բացակայությունը թե՛ Հայաստանի, թե՛ Բաքվի Հանրապետության (խմբ.), թե՛ այլ շահագրգիռ երկրների և կառույցների կողմից։ Առաքելությունը բացահայտ սադրիչ գործունեություն է ծավալում, ամբողջությամբ զբաղվում է հակառուսական քարոզչությամբ՝ հայ հասարակության մեջ կեղծ գաղափարներ սերմանելով Եվրամիության` որպես Հայաստանի «անվտանգության և բարգավաճման աղբյուրի» մասին։ Ավելին` ԵՄ գործունեությունը գնալով ստանում է հակաադրբեջանական և հակաիրանական բնույթ։ Եթե ​​խոսենք երկարաժամկետ տարածաշրջանային անվտանգության, կայունության և սոցիալ-տնտեսական զարգացման խնդիրների մասին, ապա տարածաշրջանը ռազմականացնելու և այնտեղ ԵՄ-ի ու ՆԱՏՕ-ի ռազմաքաղաքական ազդեցությունն ընդլայնելու՝ արևմտյան երկրների ծրագրերը լիովին անհամապատասխան են դրանց։ Հարավային Կովկասի բարգավաճման բանալին ներառական երկխոսությունն է, մասնավորապես «3+3» խորհրդատվական տարածաշրջանային հարթակի շրջանակում, ի հայտ եկած խնդիրների հավաքական պատասխանների որոնումը և արտատարածաշրջանային ուժերի աշխարհաքաղաքական թելադրանքին հակազդելը»,- հավելել է Գալուզինը։ո

Վերջինս ուշադրություն է հրավիրել այսպես կոչված «Զանգեզուրի միջանցք» տերմինի՝ ռուսական կողմի չօգտագործելուն:

«Խնդրում ենք նկատի ունենալ, որ մենք չենք օգտագործում «Զանգեզուրի միջանցք» տերմինը: Ռուսաստանը հանդես է գալիս ոչ թե որպես որևէ կոնկրետ երթուղու ստեղծման, այլ Հարավային Կովկասում տնտեսական և տրանսպորտային հաղորդակցությունների ամբողջական ապաշրջափակման կողմնակից։ Հենց դա է անում 2021 թվականին Ռուսաստանի, Բաքվի Հանրապետության (խմբ.) և Հայաստանի ղեկավարների որոշմամբ ստեղծված եռակողմ աշխատանքային խումբը՝ երեք երկրների փոխվարչապետների համատեղ նախագահությամբ։

Այն իրականացրել է ռիթմիկ աշխատանք և հասել զգալի արդյունքների։ Այսպիսով` 2023 թ․ հունիսին խմբի 12-րդ նիստում ընդհանուր փոխըմբռնում է ձեռք բերվել Հայաստանի և Բաքվի Հանրապետության (խմբ.) միջև երկաթուղային հաղորդակցության վերականգնման և կազմակերպման շուրջ։ Մենք գրեթե հասել ենք համապարփակ, հավասարակշռված համաձայնության։ Սակայն գործընթացը կանգ է առել ոչ մեր մեղքով։ Արևմտյան երկրների ճնշման ներքո Երևանը որոշեց սառեցնել եռակողմ համագործակցությունը նաև այս ուղղությամբ: Մենք անհրաժեշտ ենք համարում հնարավորինս շուտ վերսկսել դրա լիարժեք աշխատանքը՝ ոչ միայն Հարավային Կովկասի տրանսպորտային և կապի համակարգը ապաշրջափակելու, այլև տարածաշրջանում կայուն խաղաղություն հաստատելու համար»,- նշել է Գալուզինը։