Իսրայելին կստիպենք զղջալ Հանիեի սպանության համար. Մասուդ Փեզեշքիան
Իրանի Իսլամական Հանրապետության նախագահ Մասուդ Փեզեշքիանը Թեհրանում պաղեստինյան արմատական ՀԱՄԱՍ շարժման քաղբյուրոյի ղեկավար Իսմայիլ Հանիեի մահից հետո հայտարարել է, որ Իրանը կպաշտպանի իր ինքնիշխանությունը և ահաբեկչական բռնազավթիչներին կստիպի զղջալ իրենց արարքների համար։ Ըստ «Դետք»-ի՝ իրանական պետական IRNA լրատվական գործակալությունը հայտնում է, որ այս մասին Փեզեշքիանը գրել է X-ի իր միկրոբլոգում։
«Իրանի Իսլամական Հանրապետությունը կպաշտպանի իր տարածքային ամբողջականությունն ու արժանապատվությունը և ահաբեկիչ բռնազավթիչներին կստիպի զղջալ իրենց վախկոտ արարքների համար»,- շեշտել է Իսլամական Հանրապետության նախագահը։
Փեզեշքիանն ընդգծել է, որ Իրանի և Պաղեստինի ժողովուրդների միջև կապն ու դիմադրությանը զորավիգ լինելն առաջվանից ավելի ամուր կլինեն։
«Երեկ ես բարձրացրի նրա հաղթական ձեռքը, իսկ այսօր ստիպված եմ նրան թաղել ուսերիս դրած»,- հավելել է նա։
Հիշեցնենք, որ Իսմայիլ Հանիեն հուլիսի 31-ին սպանվել է Իրանի մայրաքաղաք Թեհրանում, որտեղ նախօրեին մասնակցել էր Փեզեշքիանի երդմնակալության արարողությանը և հանդիպել նրա հետ։
Add new comment