«Ուկրաինական պատերազմը մինչև տարեվերջ Գերմանիայի համար կարժենա մոտ 160 մլրդ եվրո». DIHK

«Ուկրաինայում ընթացող պատերազմը մինչև տարեվերջ գերմանական տնտեսության համար կարժենա մոտ 160 միլիարդ եվրո կամ տնտեսության համախառն ներքին արդյունքի մոտ 4 տոկոսը, կորցրած ավելացված արժեքով»,- ասել է Գերմանիայի առևտրի և արդյունաբերական պալատների (DIHK) ղեկավար Պիտեր Ադրիանը։

Նա «Rheinische Post»-ին ասել է. «Սա նշանակում է, որ մեկ շնչին բաժին ընկնող ՀՆԱ-ն Եվրոպայի ամենամեծ տնտեսությունում կլինի 2000 եվրոյով ավելի ցածր, քան այլ հանգամանքներում կլիներ»։

Արդյունաբերությունը գերմանական տնտեսության մեջ ավելի մեծ մասնաբաժին է կազմում, քան շատ այլ երկրներում, և ոլորտը հիմնականում էներգատար է, ինչը նշանակում է, որ գերմանական ընկերությունները հատկապես ծանր հարված են ստացել էներգակիրների գների աճից, որն անցյալ տարի Եվրոպայում հասել է ռեկորդային առավելագույնին:

Գերմանական արդյունաբերությունն էներգիայի համար կվճարի մոտ 40%-ով ավելի, քան 2021 թվականին՝ նախքան անցյալ տարվա փետրվարի 24-ին Ռուսաստանի կողմից Ուկրաինա ներխուժելու հետևանքով առաջացած ճգնաժամը։ Այս մասին նշված է անցած ամիս «Allianz Trade»-ի կողմից արված ուսումնասիրության մեջ:

«Այսպիսով՝ 2023 և 2024 թվականների աճի կանխատեսումը նույնպես ավելի ցածր է, քան շատ այլ երկրներում»,- ասել է Ադրիանը՝ հավելելով, որ անցյալ տարի նույնպես այդպես է եղել։

Գերմանիան, որը տասնամյակներ շարունակ հույսը դրել է ռուսական խողովակաշարի համեմատաբար էժան գազի վրա, այժմ բարձր գնով էներգիայից է օգտվում՝ ի տարբերություն ԱՄՆ-ի, որն ունի բնական գազի սեփական պաշարներ, իսկ Ֆրանսիան ունի առատ միջուկային էներգիա:

«Գազի գինը մոտ 3-5 անգամ բարձր է ԱՄՆ-ում գործող գնից»,- ասել է նա՝ հավելելով, որ էլեկտրաէներգիան չորս անգամ ավելի թանկ է, քան Ֆրանսիայում։