Հայաստանի հետ առցանց դիվանագիտությունն արդյունավետ չէ. Բայրամով
Ադրբեջանի արտաքին գործերի նախարար Ջեյհուն Բայրամովը կարծում է, որ Հայաստանի հետ խաղաղության պայմանագրի շուրջ քննարկումների հարցում առցանց դիվանագիտությունն անարդյունավետ է։ Ինչպես հաղորդում է ադրբեջանական APA լրատվական գործակալությունը, Բայրամովն այս մասին ասել է Բաքվում Ռուսաստանի արտաքին գործերի նախարար Սերգեյ Լավրովի հետ կայացած համատեղ մամուլի ասուլիսի ժամանակ։
Բայրամովը Հայաստանին հրավիրել է վերադառնալ բանակցությունների սեղանի շուրջը։
«Հիմա համաձայնեցված ձևաչափից բացակայում է դեմ առ դեմ հանդիպումների տարրը, բայց գործընթացն ամբողջությամբ չսպանելու համար ադրբեջանական կողմը չի հրաժարվում մեկնաբանություններ ստանալուց և ուղարկելուց, իմ ասածը հենց առցանց դիվանագիտություն է։ Այսինքն՝ մեկնաբանությունները պարզապես փոխանցվում են։ Մենք սա համարո՞ւմ ենք հաղորդակցության ամենաարդյունավետ մեթոդը խաղաղության պայմանագրի նախագծի քննարկման ժամանակ։ Կարծում եմ՝ ոչ»,- ասել է նա։
Ադրբեջանի գլխավոր դիվանագետը հավելել է, որ Բաքուն հավատարիմ է խաղաղության ոչ այլընտրանքային օրակարգին և շարունակելու է Հայաստանի հետ հարաբերությունները կարգավորելու փոխադարձ ընդունելի լուծումների որոնումը։ Նա ասել է, որ չնայած բոլոր դժվարություններին՝ Ադրբեջանը հավատարիմ է 5 սկզբունքի վրա հիմնված խաղաղության օրակարգին։
Add new comment