Սիրիայի ԱԳ նախարարը Իրանին հորդորել է երկրում քաոս չստեղծել
Սիրիայի Արաբական Հանրապետության արտաքին գործերի նորանշանակ նախարար Ասաադ Հասան ալ-Շիբանին Իրանին հորդորել է հարգել Սիրիայի ժողովրդի կամքը և երկրի ինքնիշխանությունը: Ըստ «Դետք»-ի՝ այս մասին տեղեկացնում է սիրիական պետական SANA գործակալությունը։
«Իրանը պետք է հարգի Սիրիայի ժողովրդի կամքը, երկրի ինքնիշխանությունն ու տարածքային ամբողջականությունը»,- գրել է ալ-Շիբանին՝ սոցիալական ցանցերում։
Սիրիայի արտգործնախարարը նշել է նաև, որ զգուշացրել է Իրանին Սիրիայում քաոս չտարածել և կոչ է արել պատասխանատվություն կրել վերջին հայտարարությունների համար։
Ալ-Շիբանիի ուղերձը պատասխան է Իրանի Իսլամական Հանրապետության գերագույն հոգևոր առաջնորդ Ալի Խամենեիին, ով կիրակի օրը հեռուստատեսային ելույթում կոչ էր արել սիրիացի երիտասարդներին վճռականությամբ կանգնել երկրում անկայունություն կազմակերպողների դեմ:
Հիշեցնենք՝ դեկտեմբերի 8-ին Սիրիայում զինված ընդդիմությունը հայտարարել է, որ գրավել է մայրաքաղաք Դամասկոսը և ձևավորում է անցումային իշխանություն։ Անցած շաբաթ օրը Սիրիայի ժամանակավոր կառավարությունը Ալ-Շիբանիին արտաքին գործերի նախարար է նշանակել։
Add new comment