Ամերիկյան օդուժ է տեղափոխվում Եվրոպայից Մերձավոր Արևելք. Հակոբ Բադալյան
Քաղաքական վերլուծաբան Հակոբ Բադալյանի տելեգրամյան գրառումը.
Տարբեր տեղեկություններ են այն մասին, որ ամերիկյան օդուժ է տեղափոխվում Եվրոպայից Մերձավոր Արեւելք: Սա բավականին ուշագրավ է, հատկապես ֆոնային որոշակի հանգամանքների ուղեկցությամբ:
Պենտագոնում տեղի է ունենում աննախադեպ գեներալական հավաք, որ կազմակերպել է պատերազմի նախարար Հեգսեթը: Հիշեցնեմ, որ սեպտեմբերի սկզբին պաշտպանության նախարարությունը վերանվանվեց պատերազմի նախարարություն: Հեգսեթը արտակարգ խորհրդակցության է հրավիրել գեներալակազմին, անգամ, նրանց, որոնք գործուղման են կամ ընդհանրապես ծառայում են ԱՄՆ սահմաններից դուրս: Իհարկե դա փաստ չէ, որ ԱՄՆ իրապես պատրաստվում է պատերազմի, սակայն աննախադեպ մասշտաբի ու բնույթի խորհրդակցությունը բնականաբար գրավում է ուշադրություն:
Մյուս հանգամանքը այն է, որ Թրամպը ներկայացրել է Գազայի վերաբերյալ նոր պլան, որտեղ, ըստ նրա, մնացել է ՀԱՄԱՍ-ի համաձայնությունը: Պլանի քննարկմանը ներգրավված են Իսրայելը, Կատարը, նաեւ Թուրքիան, որի արտաքին հետախուզության ղեկավարը այդ նպատակով մեկնել է կատար: Անշուշտ, պլանի հանդեպ այսպես ասած անտարբեր չեն լինելու ռեգիոնի մյուս առանցքային դերակատարները, այդ թվում Իրանը:
Ի դեպ, այդ իմաստով ուշագրավ է, որ Իրանի ԱԽ բարձրագույն խորհրդի քարտուղար Լարիջանին մեկնել է Մինսկ եւ Մոսկվա: Այս հանգամանքը ինքնին ուշադրության արժանի լինելով, թերեւս լրացուցիչ ուշագրավություն է ստանում ԱՄՆ նախագահի ուկրաինական հարցերի հատուկ ներկայացուցիչ Կելոգի այն հայտարարությունը, որ Լուաշենկոն Վաշինգտոնի եւ Մոսկվայի միջեւ հաղորդակցության օղակ է:
ԱՄՆ օդուժի տեղակայումը Մերձավոր Արեւելքում, կարող է լինել իհարկե ուժի ցուցադրություն՝ ՀԱՄՄԱՍ-ի վրա ճնշման նկատառումով: Իհարկե, մտածել, թե ՀԱՄԱՍ-ի հարցում դա կլինի անվրեպ աշխատող գործոն, թերեւս միամիտ է, հատկապես եթե հաշվի առնենք հանգամանքը, որ ՀԱՄԱՍ ասվածն ըստ էության շատ վաղուց վերածվել է թերեւս աշխարհաքաղաքական «փակ բաժնետիրական» մի ընկերության, որտեղ իրենց «բաժնեմասն» ունեն շատ խոշոր խաղացողներ:
Ավելացնել նոր մեկնաբանություն