Այսօր Հայաստանում բավարար ռեսուրսներ չկան` թուրք-ադրբեջանական տանդեմին միայնակ դիմակայելու համար. քաղաքագետ
Այսօր Հայաստանում բավարար ռեսուրսներ չկան թուրք-ադրբեջանական տանդեմին միայնակ դիմակայելու համար։ Sputnik Արմենիայի հետ զրույցում նման կարծիք է հայտնել քաղաքագետ Արման Ղուկասյանը։
«Պետք չէ ինքնախաբեությամբ զբաղվել։ Միևնույնն է, մեն-մենակ, առանց դաշնակիցների պայքարել հնարավոր չէ։ Իսրայելը որ Իսրայել է, էլի դաշնակիցներ ունի։ Այնքան խելացի է, որ ճիշտ է գծել խաղը և կարողանում է դաշնակիցների միջոցով շատ հարցեր լուծել։ Մենք փչացրել ենք Ռուսաստանի հետ հարաբերությունները, ասում ենք՝ վատն է, եկեք նրա հետ գործ չունենանք։ Որոշակի շրջանակներ կոչ են անում դուրս գալ ԵԱՏՄ-ից, ԵԱՀԿ-ից, դուրս բերել ռուսական բազան»,-նկատում է մեր զրուցակիցը։
Նա հարց է բարձրացնում՝ Ռուսաստանի հետ հարաբերությունները փչացնող Հայաստանը ո՞ւմ հետ է այլընտրանքային կապեր հաստատել։ Եթե խոսքը Ֆրանսիայի մասին է, ապա ինչո՞ւ այն մինչ օրս այլընտրանք չի առաջարկել 102-րդ ռազմակայանին։
«Ասենք հանեցիք 102-րդ բազան։ Տեղը ի՞նչ եք դնելու։ Եթե մի բան կոտրում ես, պիտի մի ուրիշ բան պատրաստ ունենաս։ Թե՞ մենք ուզում ենք ամեն ինչ ջարդել՝ եկեղեցին, դաշնակիցներին... Լավ, բա հետո՞։ ՆԱՏՕ-ն Թուրքիայի դեմ զորք պիտի մտցնի՞։ Թուրքիան ՆԱՏՕ–ի անդամ երկիր է։ Մոռացե՛ք, որ ՆԱՏՕ-ի երկրներն իրենց դաշնակցի դեմ բազա կբերեն-կդնեն։ Ինչո՞ւ։ Որովհետև ՆԱՏՕ-ի կանոնադրությամբ դա արգելված է։ Թողնենք այդ բոլոր ռոմանտիկ բաները` թե դե լավ, մեր «խաթր» Արևմուտքը Թուրքիայի հետ հարաբերությունները կվատացնի»,-ընդգծում է Ղուկասյանը։
Նրա խոսքով՝ ոչ ոք ոչինչ չի անում դիմացինի «սիրուն աչքերի» համար, պետք է հստակ հասկանալ, որ յուրաքանչյուր երկիր իր շահերից ելնելով է գործում և դադարել հուսալ, որ Եվրոպայում ինչ-որ մեկին հետաքրքրում են Հայաստանում մարդու իրավունքները։
Ղուկասյանը հիշեցնում է, որ 2020-ին, երբ Արցախում ֆոսֆորային զենք էր կիրառվում, «միջազգային հանրությունը» սահմանափակվեց սոցցանցերում հայտարարություններով։
«Հիմա ու՞մ է պետք, որ Հայաստանն այստեղ լինի, գոյություն ունենա ընդդեմ այդ հակառակորդների, որոնք կան։ Ես նկատի չունեմ այն, որ մեզ որպես զենք կօգտագործեն ինչ-որ մեկի դեմ։ Գետնի վրա հստակ ցուցիչներ կան՝ ում ռազմակայանն է և ինչ նպատակով է այստեղ ներկայացված։ Մտածեք՝ ինչու է այն Ռուսաստանինը, ոչ թե Ֆրանսիայինը»,-նշում է քաղաքագետը։
ԵՄ–ին Հայաստանի անդամակցության գործընթացի մեկնարկի մասին օրենքը նա «բուտաֆորիկ» է անվանում։ Հայաստանը մինչ օրս ԵՄ-ին անդամակցելու հայտ չի ներկայացրել, ինչը նշանակում է, որ մեզ այնտեղ չեն սպասում: Ավելին` այդ թեմայով, Ղուկասյանի կարծիքով, արդեն իսկ Հայաստանի և Եվրամիության ներկայացուցիչների միջև ոչ պաշտոնական խոսակցություն է եղել, որի ընթացքում պաշտոնական Երևանին ակնարկել են, որ առաջին հերթին հայկական կողմը պետք է մի շարք պայմաններ կատարի, որոնց թվում է Ռուսաստանը տարածաշրջանից դուրս մղելը:
«Հայաստանում օրենք ընդունեցին ԵՄ-ին անդամակցության գործընթաց սկսելու մասին։ Իսկ հետո մեր արտգործնախարարը հայտարարեց` մենք օրենքն ընդունեցինք, բայց վատ բան չմտածեք. մենք կոնկրետ բանակցություններ չենք վարում և հայտ չենք ներկայացրել։ Ի դեպ, որքան առաջ ենք գնում եվրաինտեգրման ճանապարհով, այնքան շենգենյան վիզա ստանալն ավելի է բարդանում։ Պետք է հեշտանար, բայց ավելի բարդացավ։ Այսինքն՝ Հայաստանին ասում են` դուք նախ ձեր հարցերը լուծեք, Ռուսաստանին դուրս հանեք, հետո կորոշենք` ինչ անել վիզաների հետ։ Թե չէ ԵՄ-ի ինչի՞ն է պետք այս ամենը»,-ասում է փորձագետը։
Ղուկասյանի կարծիքով` որպեսզի հետագայում ևս ստիպված չլինենք հույսը դնել սոցիալական ցանցերում պաշտպանության, Մարս մոլորակի գոյություն չունեցող «բնակիչների» կամ արհեստական բանականության վրա, Հայաստանը պետք է մտածի «ափդեյթի»` հայ-ռուսական հարաբերությունների որոշակի ռեստարտի մասին։
Ավելացնել նոր մեկնաբանություն