Չի կարելի չնկատել հարևան երկրում մեր պետության դեմ գեներացվող զավթողական նկրտումներն ու ատելության քարոզչությունը, դրանք բոլորինս են՝ անկախ քաղաքական հայացքներից
Ադրբեջանագետ Տաթևիկ Հայրապետյանի ֆեյսբուքյան գրառումը.
Նման կանխատեսելի հակառակորդի պարագայում, երբ վտանգավոր ծրագրերը գտնվում են դեռևս պատումների մակարդակում, կարելի է ու պետք է աշխատել հստակ քաղաքական, տեղեկատվական, դիվանագիտական, իրավական գործիքակազմերով՝ դրանք չեզոքացնելու համար։ Փաստացի, երբ մեր իշխանությունների թեթև ձեռամբ մենք հրաժարվում ենք Արցախի, մեր իրավունքների մասին իրական, արդար ու տրամաբանական պատումներից, զուգահեռ իրականության մեջ պետության ղեկավարի ուղիղ հրահանգով ստեղծվում են կեղծ պատումներ և տրվում է հստակ հրահանգ դրանց բազմապատկման ու տարածման ուղղությամբ:
Նման կանխատեսելի հակառակորդի պարագայում չի կարելի անգործ նստել ու սպասել, որ բանը հասնի մեկ այլ պատերազմի, էթնիկ զտման, ագրեսիայի, չի կարելի զոհասեղանին դնել մարդկային կյանքեր, այն դեպքում, երբ կարելի է այդ ամենը չեզոքացնել կամքով, խելքով ու համառ աշխատանքով։
Չի կարելի ինքնախաբեության զբաղվելով չնկատել հարևան երկրում մեր պետության ու մեր բոլորիս դեմ գեներացվող զավթողական նկրտումներն ու ատելության քարոզչությունը։ Այդ սպառնալիքները բոլորինս են՝ անկախ քաղաքական հայացքներից։ Դրանք պետք չի անտեսել, պետք չի նաև խուճապահար լիներ, պետք է հասկանալ, վերլուծել ու չեզոքացնել ճիշտ ժամանակին։ Դրա հնարավորությունը մենք ունենք, քանի որ ինչպես հենց ինքը Ալիևն է ասել, այդ օրակարգը ոչ տրամաբանական է, ոչ էլ առավել ևս՝ արդարացի։
Ավելացնել նոր մեկնաբանություն