Եվրահանձնաժողովը Ուկրաինային 70 մլրդ եվրո հատկացնելու ուղիներ է փնտրում
Եվրոպական հանձնաժողովը մտադիր է մինչև այս տարվա վերջ լուծում գտնել Ուկրաինայի 2027 թվականի ֆինանսավորման դեֆիցիտի խնդրին, հայտնում է Politico-ն՝ հղում անելով Եվրոպական հանձնաժողովի փաստաթղթին, որը հայտնվել է պարբերականի տրամադրության տակ։
«Անհրաժեշտ է սկսել 2027 թվականի համար մնացած ֆինանսավորման դեֆիցիտը ծածկելու լուծումների որոնումը՝ նպատակ ունենալով մինչև տարվա վերջ հասնել քաղաքական համաձայնության»,- ասված է երեք էջանոց փաստաթղթում։
Եվրոպական հանձնաժողովի գնահատմամբ, հաջորդ տարի Ուկրաինային լրացուցիչ կպահանջվի €70 մլրդ։ Այդ գումարից €40 մլրդ-ը բաժին է ընկնում պաշտպանական ծախսերին, ևս €30 մլրդ-ը՝ պետական բյուջեի ֆինանսավորմանը։ Դեֆիցիտը պահպանվում է նույնիսկ հաշվի առնելով €90 մլրդ վարկը, որի շուրջ ԵՄ առաջնորդները համաձայնության էին եկել 2025 թվականի դեկտեմբերին։
Եվրոպական հանձնաժողովը հաշվարկում է, որ լրացուցիչ միջոցներ կտրամադրեն Կանադան, Ճապոնիան, Մեծ Բրիտանիան և ԱՄՆ-ն։ Փաստաթղթում ընդգծվում է միջազգային գործընկերների կողմից ֆինանսական պարտավորությունների կատարման և Ուկրաինային աջակցության մեծացման անհրաժեշտությունը՝ երկրի առջև ծառացած լուրջ դժվարությունների ֆոնին։
Ավելացնել նոր մեկնաբանություն