ՀՀ արտաքին քաղաքականությունը հասնում է իր առաջնային հանգրվանին. Փաշինյան
Հայաստանի Հանրապետության կողմից վարվող բալանսավորված և բալանսավորման արտաքին քաղաքականությունը հասնում է իր առաջնային հանգրվանին, ֆեյսբուքյան էջում գրել է ՀՀ վարչապետ Նիկոլ Փաշինյանը։
«Ռուսաստանի Դաշնության հետ մեր հարաբերությունները պրակտիկ են առավել քան երբևէ, առանցքում ունենալով կոնկրետ հարցեր՝ առանց էմոցիոնալ փաթեթավորման: Մենք նպատակաուղղված ենք այս հարաբերությունները զարգացնել` փոխշահավետ համագործակցության և ինքնիշխանության հիման վրա»,- նշել է նա:
Իրանի Իսլամական Հանրապետության հետ ՀՀ-ի հարաբերությունները, ըստ վարչապետի, հիմնված են բնական շահերի վրա, Վրաստանի հետ հարաբերությունները գտնվում են ռազմավարական գործընկերության ուղեծրում, իսկ Թուրքիայի հետ ըմբռնման տեսանելի բազա է ձևավորված:
«Ադրբեջանի հետ հարաբերություններում առկա բոլոր հարցերին Հայաստանի Հանրապետությունն առաջարկել է կառուցողական լուծումներ: Ոչ թե առաջարկներ է արել, այլ լուծումներ է առաջարկել: Այս համատեքստում տարածաշրջանում էսկալացիաներ հրահրելու բոլոր ջանքերը զուրկ են լեգիտիմությունից և հիմքից, ինչը նշանակում է, որ տարածաշրջանը էսկալացնել չի հաջողվի»,- նշել է Փաշինյանը:
Անդրադառնալով ՀՀ արտաքին քաղաքականության մյուս գերակա ուղղություններին՝ Նիկոլ Փաշինյանը շեշտել է, որ Ամերիկայի Միացյալ Նահանգների հետ մեկնարկում է ռազմավարական գործընկերություն, Ֆրանսիայի հետ բարեկամությունը ամրապնդվել է և զարգացել, Հնդկաստանի հետ հարաբերությունները նոր կշիռ են ձեռքբերել, Չինաստանի հետ հարաբերությունները զարգանում են և խորանում, Մերձավոր Արևելքում գործընկերության նոր հնարավորություններ են ստեղծվել, իսկ ԵՄ-ի հետ հարաբերությունները սերտ են առավել քան երբևէ։
Ավելացնել նոր մեկնաբանություն