2024 թվականին նախատեսվում է ոստիկանության զորքերը ապառազմականացնել և վերակազմակերպել գվարդիայի

2024 թվականին նախատեսվում է ոստիկանության զորքերը ապառազմականացնել և վերակազմակերպել գվարդիայի։

«Արմենպրես»-ի հաղորդմամբ՝ ԱԺ մշտական հանձնաժողովների համատեղ նիստում 2024 թվականի պետական բյուջեի նախագծի նախնական քննարկումների ժամանակ այս մասին ասաց Ներքին գործերի նախարարության գլխավոր քարտուղար Արա Ֆիդանյանը։ 

«Ոստիկանության գվարդիային կվերապահվեն հասարակական կարգի պահպանության և հասարակական անվտանգության ապահովման, պետական շենքերի և կարևորագույն օբյեկտների պահպանության, պետական արարողակարգով նախատեսված պատվիրակությունների ուղեկցման, ինչպես նաև ռազմական և արտակարգ դրության իրավական ռեժիմի ապահովման ու այլ գործառույթներ։ 

Արդյունքում կստեղծվի զուտ ոստիկանական ծառայություն՝ միջազգային ստանդարտներին համապատասխանող նոր սպառազինությամբ ու վերապատրաստված անձնակազմով»,- ասաց Ֆիդանյանը։

Նրա խոսքով՝ ներկայումս վերջնականացման փուլում է գտնվում «Ոստիկանության գվարդիայի մասին» ՀՀ նոր օրենքի, ինչպես նաև հարակից օրենքներում փոփոխություններ կատարելու նախագծերի փաթեթը, որի շուրջ նախատեսվում է ծավալել քննարկումներ Հայաստանի Հանրապետության ազգային ժողովի ներկայացուցիչների, իրավասու պետական մարմինների ու քաղաքացիական հասարակության հետ։