Խիստ իրատեսական է, որ Մոսկվայում իրականացված ահաբեկչության հեղինակը հենց «Իսլամական պետություն» ահաբեկչական խմբավորումն է․ տարածաշրջանային հարցերի փորձագետ

Չնայած տարաբնույթ, նաև հասկանալի քաղաքական և քարոզչական շահարկումներին՝ այնուամենայնիվ խիստ իրատեսական է, որ մոսկովյան «Crocus City Hall»-ում իրականացված ահաբեկչության հեղինակը հենց «Իսլամական պետություն» (ԻՊ) ահաբեկչական խմբավորումն է։ Այս մասին ֆեյսբուքյան իր էջում գրել է տարածաշրջանային հարցերի փորձագետ Արմեն Պետրոսյանը։

«Զուտ հիշեցման համար` այս հարձակումն ընթացիկ տարվա ընթացքում առնվազն երրորդ մասշտաբային մահաբեր գործողությունն է, որի պատասխանատվությունը ստանձնել է հենց այս կառույցը, և նրա տարածած հայտարարություններին պաշտոնական հերքումներ չեն եղել։

Առաջինը հունվարի 3-ին Իրանի Քերման քաղաքում գեներալ Ղասեմ Սոլեյմանիի մահվան տարելիցին նվիրված երթի ընթացքում կազմակերպված պայթյուններն էին, որոնց զոհ գնաց 93 մարդ։

Երկրորդը հունվարի 28-ին Ստամբուլի կաթոլիկ եկեղեցիներից մեկի վրա կատարված հարձակումն էր, որի հետևանքով զոհվել է առնվազն 1 մարդ։

Մոսկովյան ահաբեկչությունն այս պահին ամենամասշտաբայինն է։

Ուշագրավ է, որ վերոնշյալ բոլոր երեք հարձակումների ընթացքում էլ առանցքային դերակատարում են ունեցել Տաջիկստանի քաղաքացիները։

Այնուամենայնիվ, կանխատեսելի էր, որ աշխարհում ակտիվացած գլոբալ և ռեգիոնալ հակամարտությունների, աշխարհաքաղաքական նման դիմակայության ֆոնին իրենց մասին կփորձեն հիշեցնել նաև ավանդական ահաբեկչական կառույցները՝ չնայած որ գաղափարական առումով նրանց ակտիվացման համար իրավիճակը գոնե առայժմ այնքան էլ բարենպաստ չէ»,- գրել է նա։