«Ըստ ԽՍՀՄ վերջին քարտեզների». Փաշինյանը խուսափեց ասել՝ կոնկրետ որ քարտեզների հիման վրա է տեղի ունենում սահմանազատումը
Ալմա-Աթայի հռչակագիրը խաղաղության պայմանագրում ներառելու հարցը այն օրակարգերից մեկն է, որ պետք է քննարկվի առաջիկայում Ալմաթիում երկու երկրների ԱԳ նախարարների գլխավորությամբ տեղի ունենալիք հանդիպման ժամանակ: Այս մասին այսօր՝ մայիսի 7-ին` մամուլի ասուլիսի ժամանակ, նշեց ՀՀ վարչապետ Նիկոլ Փաշինյանը, փոխանցում է «News.am»-ը:
«Ալմաթիի հռչկագիրը որպես Հայաստանի և Ադրբեջանի միջև սահմանազատման բազային սկզբունք ընդունված է երկու երկրների կողմից: Դա անշրջելի իրողություն է, որովհետև դա արձանագրված է երկու երկրների կողմից բարձր մակարդակով:
Ինչ վերաբերում է սահմանազատման բուն գործընթացին, ապա այն տեղի է ունենում ԽՍՀՄ իրավաբանական ուժ ունեցող ամենավերջին քարտեզների հիման վրա: Սա կարևոր արձանագրում է»,- ասաց նա
Փաշինյանը խուսափեց ասել, թե կոնկրետ որ քարտեզների հիման վրա և դա բացատրեց այսպես. «Գիտեք, որ մենք չենք ուզում կոնկրետ քարտեզի թվարկմամբ սահմանափակվել, որովհետև մեզ համար կարևոր է ՀՀ սահմանի պարագծի ամբողջական սահմանազատումը ապահովելուն միտված իրավական հիմքերի արտահայտումը: Մենք ըստ այդմ գործում ենք նաև գործնականում: Մենք գործում ենք այդ տրամաբանությամբ, օգտագործվում են քարտեզներ, որոնք արտահայտում են ԽՍՀՄ փլուզման պահին Հայաստանի և Ադրբեջանի միջև առկա սահմանները»:
Նա խոսեց նաև սահմանային սյուներ տեղադրելու մասին. «Դա կատարվում է իրավական հիմքի վրա, դրանք դառնում են անվտանգության երաշխիք Կիրանցի, Բաղանիսի, Այգեպարի և մնացած բնակավայրերի համար:
Այս գործընթացը ունի մի նպատակ՝ անիմաստ, անիրագործելի դարձնել պատերազմը: Պատերազմը զրկել տեղի ունենալու հիմքից»,- ասաց Նիկոլ Փաշինյանը:
Նա հայտարարեց, որ աշխատանքի 90 տոկոսն արդեն արված է և ինչքան դա առաջ է գնում, ավելի է ուժեղանում համոզմունքը, որ ձևավորվում են անվտանգության երաշխիքներ, և պատերազմը զրկվում է հիմքից, պատերազմը դառնում է անտրամաբանական, դառնում է ոչ լեգիտիմ:
Ավելացնել նոր մեկնաբանություն