Սահմանային գործողություն Պակիստանի և Աֆղանստանի սահմանին․ սպանվել է 29 զինյալ
Պակիստանի անվտանգության ուժերը ռազմագործողություն են իրականացրել Աֆղանստանի հետ սահմանին, որի արդյունքում, պաշտոնական տվյալներով, սպանվել է 29 զինյալ։ Այս մասին X սոցիալական հարթակում հայտնել է Պակիստանի տեղեկատվության և հեռարձակման նախարար Աթաուլլահ Թարարը։
Նրա խոսքով՝ գործողությունն իրականացվել է ի պատասխան Խայբեր Փախտունխվա և Բելուջիստան նահանգներում խաղաղ բնակիչների դեմ իրականացված ահաբեկչությունների, ինչպես նաև Կարաչիում սահմանապահների շտաբի վրա հարձակման։
Թարարը նշել է, որ անվտանգության ուժերը մանրակրկիտ պլանավորված ցամաքային գործողություն են իրականացրել Պակիստան–Աֆղանստան սահմանին, որին հաջորդել են թիրախային հարվածներ սահմանամերձ շրջանում հայտնաբերված ահաբեկիչների թաքստոցներին և հենակետերին։
Նրա խոսքով՝ գործողության ընթացքում ոչնչացվել են «Ջամաաթ-ուլ-Ահրար» և «Ֆիտնա ալ-Խավարիջ» խմբավորումների անդամներ։ Վերջինս նախկինում հայտնի էր որպես «Թեհրիկ-ի Թալիբան Պակիստան» («Պակիստանի թալիբների շարժում»)։
Ավելացնել նոր մեկնաբանություն