Շվեյցարացիները դեմ են քվեարկել կանանց զինապարտությանը
Շվեյցարացի ընտրողները կիրակի կայացած հանրաքվեի արդյունքներով վճռականորեն մերժել են ներկայիս՝ միայն տղամարդկանց համար նախատեսված զինապարտությունը բոլորի համար պարտադիր քաղաքացիական պարտքով փոխարինելու, ինչպես նաև կլիմայի փոփոխության դեմ պայքարը ֆինանսավորելու նպատակով գերհարուստներին հարկելու առաջարկը, գրում է The Local-ը։
Երկրի 26 կանտոններում քվեարկության վերջնական արդյունքները ցույց են տվել, որ ընտրողները մերժել են այդ նախաձեռնությունները, որոնք բուռն քննարկումներ էին առաջացրել հարուստ ալպիական երկրում։
«Քաղաքացիական պարտք» նախաձեռնությունը, որը նախատեսում էր Շվեյցարիայի յուրաքանչյուր քաղաքացու համար՝ անկախ սեռից, բանակում կամ քաղաքացիական կարգավիճակով ազգային ծառայություն անցնելու պահանջ, մերժվել է ընտրողների 84 տոկոսի կողմից։
Ժառանգության հարկի վերաբերյալ նախաձեռնությունը, որն առաջարկում էր խոշոր ժառանգորդների համար կլիմայի փոփոխության նոր հարկ սահմանել, նույնպես տապալվել է. ըստ պաշտոնական արդյունքների՝ 78 տոկոսը դեմ է քվեարկել։
Շվեյցարիայի կառավարությունը և խորհրդարանը նույնպես դեմ էին արտահայտվել երկու կետերին՝ պնդելով, որ դրանք կհանգեցնեն հսկայական ծախսերի և կարող են սպառնալ տնտեսությանը։
Ավելացնել նոր մեկնաբանություն