Ակնկալում ենք, որ Հայաստանը կհրապարակի ավելի քան 200 զանգվածային գերեզմանների տեղակայման վայրերը․ Հաջիև
Ադրբեջանի 4010 քաղաքացի ներկայումս համարվում է անհետ կորած։ Այս մասին հայտարարել է Ադրբեջանի նախագահի օգնական, նախագահի աշխատակազմի արտաքին քաղաքականության բաժնի ղեկավար Հիքմեթ Հաջիևը։
Ինչպես հայտնում է APA-ն, Հաջիևն այս մասին գրել է X-ի իր էջում՝ նշելով, որ հայտնի լուսանկարիչ Ռեզա Դեղաթին իրեն է նվիրել անհետ կորած ադրբեջանցիների մասին գիրքը։
Հաջիևի խոսքով՝ Դեղաթիի աշխատանքների միջոցով աշխարհին է փոխանցվում հազարավոր ընտանիքների ցավը, որոնք տասնամյակներ շարունակ սպասում են իրենց հարազատների վերադարձին։
Նա նշել է, որ Ադրբեջանի՝ օկուպացիայից ազատագրված տարածքներում հայտնաբերվել է 32 զանգվածային գերեզման։ Շարունակվում են մարդկային մնացորդների արտաշիրիմման և զոհվածների ինքնության հաստատման աշխատանքները։
Հաջիևը նաև հայտարարել է, որ Ադրբեջանն ակնկալում է Հայաստանից ավելի քան 200 զանգվածային գերեզմանների տեղակայման վայրերի վերաբերյալ տեղեկատվության տրամադրում։
Անդրադառնալով ականային վտանգին՝ նա կարևորել է 2020-2023 թվականներին նախկին շփման գծում տեղադրված ականների քարտեզների փոխանցումը։ Նրա պնդմամբ՝ ավելի քան 440 կիլոմետր երկարությամբ և ավելի քան 2 կիլոմետր խորությամբ տարածքներում տեղադրված ականները շարունակում են խաղաղ բնակիչների շրջանում մահերի և վիրավորումների պատճառ դառնալ, ինչպես նաև խոչընդոտել նախկին ներքին տեղահանվածների վերադարձը։
«Սա առաջին հերթին մարդասիրական հարց է։ Տեղեկատվության փոխանակումը կարևոր քայլ կլինի վստահության կառուցման, անցումային արդարադատության ապահովման և տարածաշրջանում կայուն խաղաղության խթանման գործում։ Ընտանիքները արժանի են իմանալու իրենց սիրելիների ճակատագիրը»,- նշել է Հիքմեթ Հաջիևը։
Add new comment