Ադրբեջանական մամուլի անդրադարձը Ռոբերտ Քոչարյանի ասուլիսին
Ադրբեջանական «haqqin.az» -ն անդրադարձել է երեկ Երևանում կայացած Ռոբերտ Քոչարյանի ասուլիսին «Քոչարյանի վերադարձը. ռևանշիզմ Կրեմլի թելադրանքի ներքո՞» վերնագրով հոդվածում:
«Անցյալի քաղաքական ստվերները կրկին երևան են գալիս. Հայաստանի նախկին նախագահ Ռոբերտ Քոչարյանը՝ մի մարդ, որն անձնավորում է անջատողականությունը, զինված հակամարտությունները և Հայաստանի կախվածությունը Ռուսաստանից, անսպասելիորեն հայտնվեց քաղաքական հորիզոնում և ասուլիս տվեց Երևանում։
Մինչ Քոչարյանի նախկին համախոհները Բաքվի զինվորական դատարանում պատասխան են տալիս Ադրբեջանի և ադրբեջանական ժողովրդի դեմ կատարած հանցագործությունների համար, նա ինքը, առանց զղջման նշույլի, կրկին փորձում է վերակենդանացնել «Ղարաբաղի հարցի» առասպելը։
Բայց ինչո՞ւ հիմա։ Իսկապե՞ս Կրեմլը կրկին սեղմել է «Քոչարյան կոճակը»: Թե՞ նա ինքն է որոշել, որ միջազգային կատակլիզմները՝ սկսած Դոնալդ Թրամփի վերադարձից Սպիտակ տուն մինչև Մոսկվայի պատրանքները Ուկրաինայում ռևանշի հասնելու մասին, նոր քաղաքական հեռանկարներ են բացում իր առջև:Առաջին հայացքից ասուլիսում Քոչարյանը պարզապես կրկնում է հայտնի քարոզչական կլիշեները՝ «Ռուսաստանը կայունության երաշխավորն է», «Փաշինյանը դավաճան է», «Արևմուտքը Հայաստանը տանում է դեպի անդունդ»։
Բայց եթե լավ մտածենք, նրա հայտարարություններն ավելի հեռուն են գնում. նա փաստացի կոչ է անում Հայաստանին կրկին դառնալ Մոսկվայի վասալը, մերժել արևմտամետ կուրսը և վերակենդանացնել Ղարաբաղյան հակամարտության ուրվականը։Հայաստանի նախկին նախագահն ասել է, որ Ղարաբաղը որպես Ադրբեջանի մաս ճանաչելը Երևանի «կոպիտ սխալն է», որ Ռուսաստանը, իբր, «ստիպված է եղել» անգործության մատնվել, քանի որ Հայաստանը «դավաճանել է» նրան, որ Արևմուտքը թուլանում է, իսկ Ռուսաստանը՝ «ուժեղանում», և կոչ է արել հրաժարվել եվրաինտեգրումից։
Այս ամենից կարելի է համզմունք հայտնել, որ դրանք ոչ թե միայն նախկին նախագահի քաղաքական երևակայություններն են, այլ Մոսկվայի ռազմավարական գիծը։ Ըստ ամենայնի, Կրեմլը չի հրաժարվում Հարավային Կովկասի տարածաշրջանն ապակայունացնելու և Հայաստանը իր քաղաքական ազդեցության ուղեծիր վերադարձնելու փորձերից։Կրեմլը գուցե իր հին խաղաքարտերն է փորձում օգտագործել, բայց քաղաքական իրականությունը փոխվել է։ Հայաստանն արդեն կատարել է իր ընտրությունը: Հարցը միայն այն է, թե մինչև երբ են Քոչարյանի նման ռևանշիստները փորձելու իրենց պարտված խաղը պարտադրել երկրին... »,- ասվում է հոդվածում:
Ավելացնել նոր մեկնաբանություն