Հութիները հայտնել են Սաուդյան Արաբիայում նավթային օբյեկտներ և օդանավակայաններ թիրախավորելու մասին
Եմենի «Անսար Ալլահ» շարժման հութիները հայտնել են Սաուդյան Արաբիային վեց հարված հասցնելու մասին։ «Արմենպրես»-ի փոխանցմամբ՝ հութիների խոսնակ Յահյա Սարին X-ում հայտնել է, որ թիրախավորվել են թագավորության օդանավակայանները և նավթավերամշակման գործարանները։
«Առաջին գործողությունը բալիստիկ հրթիռով թիրախավորել է Ռաս Թանուրայի նավթավերամշակման գործարանը, և հարվածը ճշգրիտ էր»,- նշել է նա հոկտեմբերի 29-ի ուշ երեկոյան արված գրառման մեջ։
Պաշտոնյան հավելել է, որ թիրախավորվել են Աբկայկում գտնվող «Արամկո» ընկերությունը, մայրաքաղաք Էր Ռիադի «Խալիդ արքա» և Դամմամի «Ֆահդ արքա» միջազգային օդանավակայանները, Ռաբիղ նավթավերամշակման գործարանը, ինչպես նաև Նաջրանի շրջանում սաուդյան զորքերի հավաքատեղին, որի հետևանքով զինվորներ և սպաներ են զոհվել ու վիրավորվել։
Իր հերթին, Սաուդյան Արաբիայի գլխավորած կոալիցիայի խոսնակ Թուրքի ալ-Մալիքին հայտնել է, որ հակաօդային պաշտպանության ուժերը որսացել և ոչնչացրել են հութիների անօդաչու թռչող սարքը, որն արձակվել էր Մեքքայի շրջանի ուղղությամբ։«Մեքքայի շրջանում ահաբեկչական հութի զինյալների կողմից արձակված անօդաչու թռչող սարք է որսվել և ոչնչացվել»,- նշված է X-ում հրապարակված գրառման մեջ։Ի պատասխան դրա՝ հութիների խոսնակը հոկտեմբերի 30-ին X-ում գրառման մեջ հերքել է այդ մեղադրանքը։
«Եմենի զինված ուժերը հաստատում են, որ այսօր որևէ գործողություն չեն իրականացրել Սաուդյան Արաբիայի ուղղությամբ, և որ թշնամի Սաուդյան Արաբիայի պնդումները Մեքքայի օդային տարածքում անօդաչու թռչող սարք որսալու մասին մեծ և անհիմն սուտ են։ Մեր գործողությունները թիրախավորում են նրա նավթային օբյեկտներն ու ռազմական բազաները»,- նշված է գրառման մեջ։
Ավելացնել նոր մեկնաբանություն