Եթե Իսրայելը հարվածի Իրանի միջուկային օբյեկտներին, Թեհրանը մեղսակից կհամարի ԱՄՆ-ին. Արաղչի
Իրանի միջուկային օբյեկտների վրա Իսրայելի հարձակման դեպքում Թեհրանն ԱՄՆ-ին կդիտարկի որպես նման հարձակման մեղսակից և կստիպի նրան պատասխան տալ դրա համար: Այս մասին հայտարարել է Իսլամական Հանրապետության արտաքին գործերի նախարարության ղեկավար Աբբաս Արաղչին։
«Իրանը նախազգուշացնում է Սիոնիստական ռեժիմին (նկատի ունի Իսրայելին-Խմբ.) զերծ մնալ ցանկացած հապճեպ գործողությունից և հայտարարում է, որ այս ռեժիմի կողմից ցանկացած սպառնալիք կամ խախտում կստանա կոշտ և վճռական պատասխան։ Մենք նաև համոզված ենք, որ Սիոնիստական ռեժիմի կողմից Իրանի Իսլամական Հանրապետության միջուկային օբյեկտների վրա հարձակման դեպքում ԱՄՆ կառավարությունը մեղսակից կլինի այս հարձակմանը և իրավական պատասխանատվություն կկրի դրա համար»,- ասվում է Արաղչին ՄԱԿ-ի գլխավոր քարտուղար Անտոնիո Գուտերեշին և Ատոմային էներգիայի միջազգային գործակալության (ՄԱԳԱՏԷ) ղեկավար Ռաֆայել Գրոսիին ուղղված նամակում։
Նամակի տեքստը տրամադրում է Իրանի ԱԳՆ ղեկավարի մամուլի ծառայությունը։
«Կրկնվող սպառնալիքների հետ կապված Իրանը ստիպված կլինի մի շարք միջոցներ ձեռնարկել իր միջուկային օբյեկտները պաշտպանելու համար, ինչի մասին կտեղեկացվի ՄԱԳԱՏԷ-ին»,- հավելել է դիվանագետը։
Նրա խոսքով՝ «Իրանի միջուկային ծրագիրը եղել և մնում է ՄԱԳԱՏԷ-ի համապարփակ վերահսկողության ներքո, և գործակալության ոչ մի զեկույց չի մատնանշել ծրագրի խաղաղ բնույթից որևէ շեղում»։
«Միջուկային օբյեկտների վրա հարձակման ցանկացած սպառնալիք միջազգային իրավունքի, ՄԱԿ-ի կանոնադրության և ՄԱԳԱՏԷ-ի կանոնադրության խախտում է»,- նշել է Արաղչին։
Ավելացնել նոր մեկնաբանություն