Ֆիլիպիններն ու Կանադան զինված ուժերի տեղակայման վերաբերյալ համաձայնագիր են ստորագրել
Ֆիլիպինները կիրակի օրը զինված ուժերի տեղակայման վերաբերյալ համաձայնագիր են ստորագրել Կանադայի հետ․ հերթական քայլը Հարավչինական ծովի վիճարկվող տարածքներում Պեկինի ակտիվությանը հակազդելու ուղղությամբ, հաղորդում է AFP-ն։
Ֆիլիպիններն ու Չինաստանը հաճախ են բախվում այս ռազմավարական ջրային ուղու շուրջ, որի գրեթե ամբողջ տարածքի վրա Պեկինը հավակնություններ ունի։
Կանադայի թագավորական ռազմածովային ուժերը նախորդ տարի սկսել էին մասնակցել համատեղ ծովային պարեկային գործողություններին՝ ԱՄՆ-ի, Ավստրալիայի, Ճապոնիայի և Ֆիլիպինների գործընկերների հետ։ Նոր համաձայնագիրը թույլ կտա կանադացի զինծառայողներին մասնակցել նաև համատեղ ցամաքային զորավարժություններին։
Կանադայի պաշտպանության նախարար Դեյվիդ Մագգինտին նշել է, որ համաձայնագիրը կխորացնի հարաբերությունները ֆիլիպինյան զինված ուժերի հետ՝ միաժամանակ աջակցելով Օտտավայի ռազմավարությանը Ասիա-Խաղաղօվկիանոսյան տարածաշրջանում, որը նախատեսում է «առաջնային ներկայություն»։
«Մենք առաջ կշարժվենք պատրաստության, ռազմական ուսումնական հաստատությունների հետ փոխանակումների, տեղեկատվության փոխանակման և կիբերանվտանգության ոլորտում փոխըմբռնման ուղղությամբ», — ասել է նա Մանիլայում կայացած համատեղ մամուլի ասուլիսի ժամանակ։
Նա հավելել է, որ Կանադան հույս ունի մասնակցել հաջորդ գարնանը կայանալիք Balikatan տարեկան զորավարժություններին։ Մանիլան, որպես ԱՄՆ-ի պայմանագրային դաշնակից, այս տարի արդեն ստորագրել է զորքերի տեղակայման համաձայնագիր Նոր Զելանդիայի հետ և ունի նման համաձայնագրեր ԱՄՆ-ի, Ավստրալիայի և Ճապոնիայի հետ։ Նմանատիպ համաձայնագիր պատրաստվում է նաև Ֆրանսիայի հետ։
Ավելացնել նոր մեկնաբանություն