Գումարտակից էլ փոքր. աշխարհի ամենափոքր բանակները. Սան Մարինո
Աշխարհում կան որոշ երկրներ, որոնք իրենց ներքին և արտաքին անվտանգությունն ապահովելու համար ամենևին էլ կարիք չունեն բազմահազարանոց բանակ պահելու: Այդ երկրները ևս ունեն զինված ուժեր, թեև մի քիչ դժվար է մի քանի տասնյակի կամ հարյուրյակի հասնող խումբը բանակ անվանելը: Սակայն հաշվի առնելով դրանց գործառույթները և ստեղծման նպատակը՝ մենք, այնուամենայնիվ, պետք է ընդունենք, որ բանակը կարող է լինել նաև սակավաթիվ:
Սան Մարինո
61 քառակուսի կմ տարածք ունեցող Սան Մարինոյի Հանրապետության բանակում կա 450-500 մարդ։ Գաճաճ պետության համար դա էլ մեծ թիվ է, քանի որ ամբողջ երկիրը շրջապատված է Իտալիայով և գտնվում է Հռոմի պրոտեկտորատի ներքո։ Հիմնական ռազմական զորակազմը պալատական պահակային կորպուսն է, որի պարտականություններն են պալատի պահպանությունը, սահմանների պարեկությունը և ոստիկանությանն օգնելը։
Քանի որ Սան Մարինոն ՆԱՏՕ-ի, ԵՄ-ի և այլ ռազմական դաշինքների անդամ չէ, բանակն օգտագործվում է բացառապես հանդիսավոր միջոցառումների՝ ազգային տոների և օտարերկրյա կառավարական պատվիրակությունների հանդիպումների ժամանակ: Պատվո պահակախումբը զինված է տարբեր մոդելների ավստրիական «Glock» ատրճանակներով, ինչպես նաև 1959 թվականի մոդելի իտալական «Beretta BM59» հրացաններով։ Կիրառվող զինատեսակներից են նաև մուշկետը և սուսերը:
Երկիրը չունի զրահատեխնիկա և օդուժ, իսկ զինվորների արագ տեղափոխման համար օգտագործվում են սովորական ամենագնացները:
Երկիրը վաղուց է հրաժարվել պարտադիր զորակոչից, սակայն 16-60 տարեկան բոլոր քաղաքացիները կարող են զորակոչվել բանակ կամ կամավոր զինվորագրվել 18 տարեկանից: 2008 թվականի դեկտեմբերի 3-ին երկիրը ստորագրել է կասետային զինամթերքիկիրառումը դադարեցնելու մասին կոնվենցիան (որն ուժի մեջ է մտել 2010 թվականի օգոստոսի 1-ից)։
Չնայած իր համեստ բանակին՝ հանրապետությունը մասնակցել է պատերազմների, օրինակ՝ Առաջին համաշխարհային պատերազմում եղել է «Անտանտի» կողմնակիցը և մարտերին մասնակցելու համար հատկացրել 15 զինվոր։ Երկրորդ համաշխարհային պատերազմի ժամանակ, չնայած իշխանությունների կողմից հայտարարված չեզոքությանը, Սան Մարինոն օկուպացվել է գերմանացիների կողմից։
Ավելացնել նոր մեկնաբանություն