Իսրայելը և ՀԱՄԱՍ-ը Եգիպտոսի միջնորդությամբ բանակցություններ են սկսել Թրամփի ծրագրի պայմանների շուրջ
Այսօր Եգիպտոսի իշխանությունների միջնորդությամբ Կահիրեում մեկնարկել են Իսրայելի և ՀԱՄԱՍ շարժման բանակցությունները։ Քննարկման հիմնական թեման Գազայի հատվածում ռազմական գործողությունների դադարեցման պայմաններն են, որոնք ներառված են ԱՄՆ նախագահ Դոնալդ Թրամփի խաղաղության ծրագրում։
Բանակցությունների առաջին փուլում նախատեսվում է քննարկել պատանդների ազատ արձակման հարցը։ Եգիպտոս է մեկնել նաև ԱՄՆ նախագահի հատուկ ներկայացուցիչ Սթիվ Ուիթքոֆը։
Բանակցություններից առաջ Թրամփը իր Truth Social հարթակում գրել է, որ «շատ դրական քննարկումներ» են ունեցել ՀԱՄԱՍ-ի և մի շարք երկրների հետ՝ Գազայում պատերազմի դադարեցման և պատանդների ազատման շուրջ։ Նրա խոսքով՝ տեխնիկական խմբերը Եգիպտոսում կշարունակեն աշխատանքը, իսկ ծրագրի առաջին փուլը պետք է ավարտվի այս շաբաթ։
Թրամփի առաջարկած 20-կետանոց խաղաղության պլանը նախատեսում է Գազայում ռազմական գործողությունների դադարեցում՝ ՀԱՄԱՍ-ի կողմից բոլոր պատանդների ազատումից 72 ժամ անց, Իսրայելի կողմից հարյուրավոր պաղեստինցի բանտարկյալների ազատում, իսրայելական զորքերի աստիճանական դուրսբերում Գազայից, ՀԱՄԱՍ-ի զինաթափում և Գազայի հատվածում միջազգային կառավարմամբ Խաղաղության խորհրդի ձևավորում։
Ծրագիրը նաև բացառում է ՀԱՄԱՍ-ի մասնակցությունը Գազայի հատվածի ապագա կառավարմանը։
Ավելացնել նոր մեկնաբանություն