Իրանն Արևմտյան Ասիայում ունի ռազմական ուղղաթիռների ամենահզոր նավատորմը
Իրանի Իսլամական Հանրապետության Իրանի բանակի ցամաքային ուժերի օդադեսանտային ստորաբաժանման հրամանատար Յուսեֆ Քորբանին հայտարարել է, որ Իրանն Արևմտյան Ասիայում ունի ռազմական ուղղաթիռների ամենահզոր նավատորմը, որը հագեցած է բարդ զինամթերքով, և այն նախատեսված է իրական մարտերում արագ գործողությունների համար։ Ըստ «Դետք»-ի՝ այս մասին տեղեկացնում է իրանական պետական IRNA լրատվական գործակալությունը։
Քորբանին հայտնել է, որ իր գլխավորած ստորաբաժանումը հասել է մարտունակության բարձր մակարդակի՝ չնայած արևմուտքի կողմից սահմանված պատժամիջոցներին։ Նա այս համատեքստում բարձր է գնահատել իրանցի ռազմական փորձագետներին և տեխնիկական մասնագետներին՝ ուղղաթիռի բաղադրիչների լայն տեսականի արտադրելու համար և նշել, որ բանակի օդադեսանտային ստորաբաժանման կողմից շահագործվող մարտական ուղղաթիռները համալրվել են ժամանակակից սարքավորումներով։
Իրանի բանակի ցամաքային ուժերի օդադեսանտային ստորաբաժանման հրամանատարը նշել է, որ իրանական ռազմական ուղղաթիռները զինված են հեռահար և կրակի և մոռացության հրթիռներով, ինչը նրանց տալիս է գերճշգրիտ գործելու հնարավորություն։ Նրա խոսքով՝ գործարկվելուց հետո այս հրթիռները կարող են ոչնչացնել թշնամու թիրախները ընդամենը երեք վայրկյանում։
Վերջինս հավելել է, որ իրանական ռազմական ուղղաթիռների զգալի մասը համալրվել է գերժամանակակից գիշերային տեսողության համակարգերով։ «Իրանական ուղղաթիռներն այժմ ունեն նույն բարդ տեխնոլոգիան, որն առկա աշխարհի առաջադեմ բոլոր ուղղաթիռներում»,- եզրափակել է նա։
#Դետքի_հետագծով
Իրանցի պաշտոնյաները մշտապես հայտարարում են, որ երկիրը շարունակում է վճռականորեն ընդլայնել իր ռազմական կարողությունները, ներառյալ իր հրթիռային հզորությունը, որը ծառայում է բացառապես պաշտպանական նպատակներին: Նրանք պարբերաբար նաև վերահաստատում են, որ Իրանի պաշտպանական կարողությունները բանակցությունների ենթակա չեն և երբեք փոխզիջումների չեն ենթարկվի։
Ավելացնել նոր մեկնաբանություն